RIMONGRIMONG KAN BANWA

Tigsik ko an iwal kan parakiulimbat saka mahabas

Mientras pagulangan pagbanga kan pirak

Ogmado an sungayan na si Satanas

Condenadong kalag sa impiyerno madagdag!

Tigsik ko an buayang sagrado

Mantang nagdadakol an gibong milagro

Mas naggigin santo kan lokoloko

Sa Centro piggibohan monumento!

Tigsik ko ining Principal Suspect

Maurag an tandem ki Visor na malupig

Dapat parehong sikadan sa DepEd

Sa publico grabe an pasakit!

Tigsik  ko si Cong. Telesforo Ampaw

An proyekto anas tubong lugaw

Bilyones an pigkulimbat sa kaban

An gobyerno ginibong gatasan!

Tigsik ko an aki pang si Sabel

Wilwil an ngabil paghalat kan bullet train

Haen na? Sige an kubilkubil

Dawa relis mayo pa, anas drowing!

Tigsik ko an district hospital sa Goa

Kan dae nabuksan sigeng rimongrimong kan banwa

Ngonian na mapapakinabangan na

Dakol an nagtamuyaw, abaa na!