RLL nagpapatios sa mga paraoma

Ciudad nin Sorsogon --- An Rice Liberalization Law iyo man giraray an nakaka-apekto sa sektor nin paraoma puon na maaprubaran ini ni Presidente Rodrigo Duterte kan 2018 asin iyo an kurahaw kan sektor nin paraoma na ibasura sa mga protest rally sa huring State of the Nation Address kan Presidente.


Si Fernando Balmaceda, parapahayag kan ISambayan sa Sorsogon an bagay na ini pigbuyagyag kan grupo nin paraoma Samahan ng mga Magsasaka sa Sorsogon (SAMASOR), kabale sa Kilusang Magbubukid ng Pilipinas (KMP) Bikol base sa saindang pag-aadal kun ta’no ta mas nagruro an kamugtakan kan pagbuhay nin mga paraoma.


Saro saindang pigbasehan iyo an resulta sa survey kan Philippine Statistics Authority (PSA) sa kainturohan na populasyon, an nangengenutan na halangkaw an pagtios iyo an paraoma na nagsakat na sa 31.6 por ciento nagsunod an sektor nin parasira 26.2 por ciento.


Sinabi pa na kan mayo pang RLL na inaprubaran kan presenteng administrasyon Duterte dai pang gayo apektado an mga paraoma alagad biglang nagtios an sektor na ini mas lalo na ngunian na pandemya.


Kan premirong taon kan RLL si presyo kan paroy sa Bicol nagparababa sagcod sa P8, P9 hale sa dating P20 asin padagos pang pigkakastigo an sektor kan hababang presyo.


Nakinabang kan controvercial na ley iyo si mga higanteng rice traders mantang sinda an nagdidikta kan presyo kan bagas sa mercado.


Kan panahon na dai pa na-aaprubaran ni Duterte an ley an manlaen-laen na organisasyon nin paraoma sa nasyon nagpetisyon na dapat ibasura an RLL mantang sinda an apektado, alagad pinirmahan man giraray.


Sa mga ginibong protest rally sa manlaen-laen na provincia sa nasyon asin Manila an isyu sa RLL Law kabale sa saindang pigrereclamo sa administrasyon Duterte. (dpa)


Sinabayan nin protest rally sa Plaza Rizal kan Ciudad nin Naga nin progresibong grupo sa Camarines Sur an huring State of the Nation Address ni Presidente Rodrigo Duterte na tinawan nin bagsak na grado. Sa saindang mga placards pigdedenuncia an puros pangako dai man nakumple matatapos na an saiyang anom na taon sa Malacañan. Saiyang pig-urgolyo an bilyones pesos na build-build-build program alagad dakul an mga nagkakagurotom na Filipino. (BAYAN CSUR FB)