top of page

Road widening padagos sa Partido area

Ni Sonny Malate


Tigaon, Camarines Sur --- Padagos an ginigibong pagpahiwas kan national road sa Partido Area.


Segun ki Engr.  Sanny A. Cañeso, Spokesperson kan DPWH 4th Engineering District na nakabase sa Tigaon, Camarines Sur, asin pinapamayohan ni District Engineer Gemma  B. Timbang, sa presente an kinakasibotan na road widening iyo an portion kan Mabalodbalod, Tigaon hasta sa banwaan kan Lagonoy.


Sinabi pa man ni Cañeso na enot na ngonang pinahiwas an mga tulay sa laog kan nabanggit na portion tanganing maacomodar an mga vehiculo asin publico na nag-aagi digdi. Siring man, ini bilang preparasyon sa tamang hiwas  kan tinampo na 20 metros.


Base sa ley, an national road may sukol na 20 metros o tig- diez metros hale sa tahaw kan tinampo. Dakol na tinampo sa Bicol asin ibang parte kan nacion an dae pa nakasunod digdi kaya kinakaipohan na magkaigua nin road widening.


Sa presente, iguang mga portion sa laog kan road span na clarado na an road right of way. An iba piglalakaw pa man sa kagsadiri tanganing dagosdagos na an proyekto na iguang 19 kilometrong  distancia,  na an fundo hale sa gobyerno nacional.

On-going an pagpahiwas kan tulay sa Boclod, San Jose, Camarines Sur bilang preparasyon sa road widening project sa portion kan Tigaon- Lagonoy.


Segun ki Cañeso,  an saindang oficina  nagcoconducir nin mga asemblea kun saen ipinapaliwanag sa publico an dapit sa ventaje kaini, relocation, compensation asin iba pang issue  dapit sa road widening project kan gobyerno.


Dinagdag pa man kan enhinyero na dapit sa situacion kan mga centro o poblacion na dakol na mga edeficio comercial an nahagop kan 20 metros na hiwas, sinda nakicoordinar na sa mga local government unit na nakakasakop kaini.


Initialmente, an mga local government unit nag-proponer kan pagconstruir nin by-pass/diversion road tanganing dae na maagihan kan road widening an mga centro kan banwaan.


An proposal na ini maagi sa legislative body kan banwa, gigibohan nin feasiblity study asin kun rasonable  hahanapan nin fundo para sa implementacion kaini.


An mga local government unit kan Tigaon, Goa, San Jose asin Lagonoy igua nang natutunggit na posibleng magin by-pass/diversion road area sa saindang mga  banwaan. Sa tamang procesong aagihan kaini, an by-pass/diversion road project mahihidale an implementacion.


Mientrastanto, pigbuyagyag ni Cañeso na igua nang mga naenot na road  widening project sa ibang parte kan Partido Area bago pa man kan Mabalodbalod, Tigaon- Lagonoy portion.


Dinagdag pa niya na may mga road opening project na padagos na pig-iimplementar sa iba-ibang banwaan sa Partido Area, orug  na sa mga costales asin kabukidan digdi. 


An mga proyektong ini an dakulang contribuente sa pagpagantad kan turismo, economia asin facilidad sa transportation sa distrito kan Partido.


Segun sa Spokesperon, an mga structurang ini macomplemento sa presenteng proyektong Partido Boulevard asin an proponedong Partido International Airport.


An airport initialmente pigplano pa durante sa panahon ni defuntong Cong. Arnulfo P. Fuentebella. Huli sa higot na pagkontra kan pirang sector, ini an dae nadagos. Ngonian, sa panahon ni Cong. Arnie B. Fuentebella, ini  liwat  na pigmamaigotan na marealizar para sa kauswagan kan Partido Area asin bilog na Kabikolan.

ความคิดเห็น


bottom of page