Robredo, 3 pang mga alcalde sa CamSur kabale sa M4GG

Si dating Bise Presidente asin ngunian Alcalde Leni G. Robredo kan Ciudad nin Naga asin tolo pang mga alcalde sa Camarines Sur na sinda Edelson Marfil kan Libmanan; Jerold Peña kan San Jose, asin Edward Albert Prades kan Tinambac kabale na sa grupo kan Mayors for Good Governance (M4GG).

An iba pang mga alcalde sinda Vico Sotto kan Ciudad nin Pasay, Benjamin Magalong kan Ciudad nin Baguio, Joy Belmonte kan Ciudad nin Quezon, Aries Lim kan Talavera, Nueva Ecija, Wes Gatchalian kan Ciudad nin Valenzuela asin abot sa quince pang iba. Sinda iyo an grupo nin mga jefe ejecutivo para sa silag na pagpadalagan kan lokal na gobierno asin ‘‘accountability for government’’

Alagad magigirumduman kan panahon ni dipuntong Alcalde Jesse Robredo asin City Administrator pa kaidto na ngunian Bise Alcalde Gabriel H. Bordado Jr., enot nang pigponan an ‘’Good Governance’’ sagcod na pinadagos kan nagsuronod na mga jefe ejecutivo kan lokal na gobierno kan ciudad. An pagbilog asin nagdadanay sagcod sa ngunian na Naga City People’s Council na pig-aadaptar na kan ibang mga LGUs dakulang bagay na envuelto na an namamanuan nganing makaparticipar sa pagpadalagan kan gobierno lokal.

Sinda nasa ‘‘Observer Status’’, magpapadalagan kan bagong mga advocacia asin inobasyon sa pagbabago sa pagpapadalagan kan gobierno. Sa paagi kan pag-iiribahan sa M4GG sinda magtatarabangan sa mas silag na pag-gogobernar na dakulang bagay para sa namamanuan. (dpa)