Robredo-Bordado Tandem sa 2025?

Posibleng mangyari an Robredo-Bordado Tandem sa eleksyon sa 2025 sa Ciudad nin Naga kasunod kan kumfirmasyon na nagsumiter nin Candidate bio-data form si Representante Gabriel H. Bordado Jr. komo nomindado sa cargong bise alcalde.

An bio-data form saro sa mga hinagad ni dating Bise Presidente Leni Robredo nganing ibale sa selection process an arin man na asperanteng bise alcalde mantang nagrarani na an pagsangat nin certifico de candidatura sa Comelec sa maabot na Oktubre 2024.

Ini ngunian an urolay-ulay kan mga ‘'political observer’’ sa Naga sa tahaw kan nagpopoon nang maggibsaw an mga pangaran kan asperante para sa eleksyon lokal sa Mayo 2025.

An familia Robredo asin Bordado labi nang tolong decada nag-iiribanan panahon pa ki dati asin dipuntong Alcalde Jesse Robredo poon pa sa tinunaw na Bicol River Basin Development Program.

Dawa na ngani igua pang tolong nominado na karibal si Bordado na kinababalihan ninda Bise Alcalde Cecilia De Asis, asin Consejales Oying Rosales saka Jess Albeus alagad anas nagtutubod magiging patas an proceso.

An apat na mga nominado nagpangako kun dai sinda mapili dai na macandidato sa maabot na eleksyon komo pagsunod sa proceso.

Si Bordado na ultimo nang termino sa congreso enot nang nagpahayag na mapahingalo na sa politica alagad huli kan pag-endorso kan ibang grupo asin manipesto kan mga dating punong barangay, nagsumiter kan saiyang pagbalik sa politica sa ciudad matapos makabali sa mga nominado.

An selection process sa mga candidato lokal kan Team Naga orihinal na nagpoon sa dipuntong Alcalde Robredo na sagcod sa ngunian pinapadagos.

An participantes sa konsultasyon asin pagpili kan mga opisyal na candidato kan Team Naga kinababalihan kan 27 organisasyon saka opisyales de barangay asin Sangguniang Kabataan.

Afuera sa apat na mga nominadong candidato sa cargong bise alcalde mapili man nin sampolo sa mga nominadong consejal hale sa 27 nagsumiter kan saindang candidate bio-data.

‘’BACK TO THE PAST’’, sabi sa FB page ni Cong. Bordado kan siya pa an nagpupugol kan gavel alagad posibleng magbalik sa SP.