Robredo mabwelta sa Naga

Sa laog kan bulan nin Abril 2024 mababarang na an magigin desisyon ni dating Bise Presidente Leni G. Robredo sa politica oras na magpalista sa Comelec bilang botante kan Ciudad nin Naga hali sa Barangay Carangcang, Magarao, Camarines Sur.

Napag-araman sa kampo kan dating bise presidente kun mabuelta sa politica iginigilid na magcandidatong senador alagad mas prayoridad sa eleksyon lokal 2025 sa Ciudad nin Naga.

Mayo pang desisyon alagad bakong harayo na magcandidatong alcalde kan ciudad mala ngani naglilibot na sa mga barangay kaibanan si Representante Gabriel H. Bordado Jr. kan tercer distrito kan Camarines Sur.

Sa ngunian kun napuli sa Naga permi na siyang yaon sa residencia kan saiyang magurang na si dipuntong Juez Antonio Gerona sa Barangay Concepcion Pequeña mala ngani kun may miting sa saiyang mga lider digdi na nagtitiripon, sabi pa kan kampo kan dating VP.

Haloy nang dai nag-uurulay sinda Robredo saka Alcalde Nelson Legacion kan Team Naga.

Alagad si Tato Mendoza na nagcandidatong alcalde na nadaog sa eleksyon magkakaigwa nin urulay kan dating VP.

Igwa nang naghihiro sa grupo sa paagi kan dating selection process ni dipuntong Mayor asin DILG Secretary Jesse M. Robredo sa mga pipilion na candidato lokal sa eleksyon sa 2025.

Sa lado ni Legacion, sinabi kaini sa miembros kan media nganing dai magkabaranga an saindang grupo andam siyang magdalagan sa cargong congressman sa tercer distrito kan Camarines Sur. (dpa)

Si Representante Gabriel H. Bordado Jr. saka dating VP Leni Robredo nagbibisita sa Brgy. Mabolo nganing hanapan nin solusyon an problema sa baha kaibanan an opisyales de brgy sa pamamayo ni PB Noel Constantino. (Abang Mabolo FB)