Robredo masayuma sa itatangro na puwesto sa DepEd

MAYO nang ibang padudumanang ibang dalan si dating bise president Abogada Leni Robredo kundi an magdalagan para sa kargong pagka alkalde kan syudad nin Naga.

Ini an saiyang kasimbagan sa kahapotan na may koneksyon sa bareta mapadapit sa saiyang tutukawan na pwesto komo sekretarya kan Departamento de Edukasyon enkaso na itangro ini sa saiya ni Presidente Ferdinand Marcos Jr.

Sa paghampang niya sa mga kagawad kan local na media pigsabi ni Robredo na an saiyang direskyon iyo an mag-aspirar sa pwestong alkalde kan syudad.

Pigsabi pa ni Robredo na sarado na ini sa iba pang suhestyon na magdalagan para sa kargong senador.

Dugang pa ni Robredo, magigibo kaining mag anunsyar opisyalmente manungod sa saiyang pagdalagan oras na makapaaram na ini sa gabos na mga personang may kinaaraman sa saiyang mga kalakawan.

Saro na digdi an Angat Buhay program na susug saiya kaipuhan niya na nguna makipag-olay siring kan nagibo na kaini sa Liberal Party, magin ki Alkalde Nelson Legacion, na napabaretang madalagan sa kargong diputado para sa tercer distrito kan Camarines Sur.

Mientrastanto, si Noel De Luna, famosong negosyante asin amigo ni Robredo, nagsabi kan nakalihis pang semana, na posible ining madalagan pagka alkalde kan Naga.

Kan ihapot ini ki Robredo, nagsimbag na gabos may diretso na magdalagan para sa pagka alkalde alagad nangapodan ini na magkasararo na sana tanganing pakarhayon an an dapat nang pakarhayon.

Marurumdoman sarong surat an pigpadara ni Robredo ki Legacion asin mga miembros kan Sangguniang Panlungsod – laman an nagkapirang isyus sa payroll kan STL, halangkaw na bidding fee sa mga kontraktor, magin mga suboot anomaliya imbwelto sinda Abogado Paul John Barossa asin City Engr. Alexander Caning. (Paulo DS. Papa)