Robredo mayo pang pig endorsong kandidato sa Naga, Camarines Sur

Ni Paulo DS. Papa

MAYO pa ni sarong endorsement si dating bise presidente Leni Robredo sa si isay man na kandidatomg lokal sa syudad nin Naga, magin saen pa man sa Camarimes Sur.

Ini kasumpay kan isyu na pigbukas sa saiya mapadapit sa mga tarpauline na nakabugtak na sa mga gilid nin tinampo laman an lalawgon kan nagkapirang mga magkakaralaban na kandidatong lokal kaiba si Robredo komo suporta.

Saro na diyan si Alkalde Nelson Legacion kan syudad nin Naga na sa presente nagdadalagan para sa kargong kongresista kan tercer distrito kan Camarines Sur.

Si Legacion madalagan kudta na para sa huri kaining termino komo alkalde kan syudad sa 2025 midterm election alagad nag aspirar para sa mas halangkaw na posisyon pakalihis na magpa rehistro komo kandidato si Robredo para sa pagka alkalde kan Naga.

Segun ki Robredo, mawot kaini magbalik sa city hall huli na man sa mga anomaliya sa city hall katakod kan Small Town Lottery (STL), halangkaw na sengil para sa bidding kan mga contractor asin iba pa.

Enot nang nagsabi si Robredo na may papakarhayon ining mga iregularidades sa city hall kaya ini mabwelta.

Suboot mawot na pagparalisar ki Robredo sa saiyang pagtukaw komo alkaldesa

Duda si Robredo sa nangyayaring mass employment asin promotion sa city hall kun haen nagpakol na sa 172 na empleyados an pigbugtak sa permanent position pirang bulan antes na matapos an 2024.

An pagdudang ini ni Robredo nabilog huli na man sa 140 empleyados kan syudad na nagin permanente sa laog kan peryodong 2019 sundo 2023.

Segun pa ki Robredo, baga na piggigibo an lagduan asin marikas na promotion sa city hall ni Legacion tanganing dae na kaini mahiro pa oras na siya magtukaw na komo alkalde.

Padagos man ini nagreresibe nin manlaen-laen na reklamo hale sa mga dati nang empleyados sa city hall sa pagduda na baad dae na nasusunod an tamang proseso sa promotion huli na ngani sa marikas asin lagduan na promotions na suboot igwa pa nin second batch.

Nagpromesa man si Robredo na ini rerepasuhon niya pagtukaw kaini sa pwesto.