Robredo sa ciudad nin Naga, Villafuerte liwat sa CamSur

Ni Paulo DS. Papa

LIWAT na nagreynar an apelyidong Robredo sa syudad nin Naga asin Villafuerte sa provincia kan Camarines Sur susug sa pinakahuring resulta kan iskotinyo alas-7:30 nin banggui, Mayo 13 sa 98.43 por syentong election returns.

Sa kargong alkalde kan independent component city of Naga: Si Abogada Leni Robredo, esposo ni depuntong Jessie Robredo, nakaguno nin 83,871 - pinakahalangkaw na voto kumpara sa 6,032 na nakua ni Toots De Quiros; 884 ni Louie Ortega asin 721 ni Ganda Abrazado.

Sa kargong bise alkalde dae pa makakapahingalo sa pulitika si Incumbent Cong. Gabby Bordado kan tercer distrito na nakaguno nin 46,415ng voto laban sa kalaban na si Tato Mendoza na may 41,252ng voto; 1,439 ki Benjamin Villafuerte mantang 774 ki Topi Fortuna.

Matatandaan na mawot na ni Bordado na magpahingalo na sa politika komo pribadong persona alagad pigpugulan ini ni Robredo sa rason na mas gurang saiya si Bise Alkalde Nene De Asis asin iba pang persona sa politika.

Sa kargong konsehal nakalaog sa sampolo sinda dating city administrator na si Elmer Baldemoro, kalinyada ni Robredo - mabalik sa puestong pagka konsehal kan Naga.

Kaiba na an mga incumbent councilors na sinda Dr. Jessie Albeus, Atty. Oying Rosales, Gayle Abonal - Gomez asin si Gen. Omar Buenafe. An mga ini yaon sa linyada ni Robredo, kaiba an mga ganador man na dating may mga katungdan sa city hall: Sinda dating budget officer Frank Mendoza asin si dating city health officer na si Dr. Vito Borja II.

Dae na pinalad pang palaogon sa Sanngguniang Panlungsod an kalinyada kan abogada na sinda Councilor Jose Perez asin an mabwelta kudta nang si Atty. Miles Arroyo.

Magigin bago sa konseho kan Naga sinda Atty. Areiz Macaraig, nasa linyada ni Robredo; Jude Diokno, asin si dating konsehal na si Nathan Sergio.

Sa kapitolyo probinsyal kan Camarines Sur liwat nagbabalik sa puestong gobernador si 2nd District Cong. LRay Villafuerte na nakakuang 519,554 ng boto kontra ki Mr. Bong Rodriguez na may botong 428,032.

An resulta kan gubernatorial poll labing kinadismaya kan mga suportadores magin mga netizens sa ibang probinsya asin nasyon na naglaom nin pagbabago sa Camarines Sur.

Kabale na sa mga reaksyon an pagbasol ki Robredo huli sa kawaran kaini nin endorsement ki Rodriguez.

Kan fetsa 24 nin Abril, hayagan na pigsabi ni Rodriguez na nagin kasalan niya an kawaran nin endorsement saiya ni Robredo.

Pigsabi kaini na dae lamang nakable si Robredo sa sarong tiripon kaiba an saiyang mga political allies mapadapit sa saiyang pagdesidir na magdalagan na sana para sa kargong gobernador kan probinsya. Huli digdi dae lamang nakapaaram si Rodriguez ki Robredo para sa katuyuhan.

Pirang aldaw bago an pahayag ni Rodriguez hayagan na man na nagtaram si Robredo na dae ini makikisawsaw sa dae man siya kabale. Ini simbag niya sa kahapotan manungod sa kawaran kaini nin endorsement ki Rodriguez.

MGA ganador sa kargong alkalde, bise alkalde asin konsehal kan syudad nin Naga durante kan proklamasyon na pigpangenotan kan Comelec. (Naga City Government photo)