Robredo suportado kan Team Tatoots sa presidential elections

Panahon nang magkaigwang premirong Bicolano presidente na dapat nagkakasararo an gabos na lideres asin namamanuan na kaipuhan suportaran si Bise Presidente Leni Robredo na nagplantiar kan saiyang certifico de candidatura (COC) bilang independiente candidato sa maabot na eleksyon presidential.

Sa press conference matapos maplantiar nin COC sa Comelec an Team Tatoots (TT) kan Oktubre 7 na pinangenotan ni Fortunato ‘‘Tato’’ Mendoza komo candidatong alcalde sinabi kaini an saindang team bilog an suporta sa ambisyon ni Robredo nganing maging presidente kan nasyon.

Si Robredo nagkumfirmar sana kan saiyang candidatura kan Oktubre 7, alagad si Mendoza dai nagduwa-duwa na magtindog sa atubangan kan press conference nganing saiyang kumfirmaron na bilog an saindang suporta sa candidatura kan bise presidente na dapat magkasararo na an gabos na Bicolano kan bilog na suporta.

Perang decada nang mayong presidente kan nasyon na hale sa Bicol asin kun mangyari magtukaw siya sa Malacañang makakatabang sa satong rehiyon nganing mag-uswag bako lang sa lado nin economia envez sa mga proyekto na dai nadadara kan mga nakaaging pamayo kan nasyon.

Kan nakaaging eleksyon lokal sinabi pa ni Mendoza dinaog sana siya nin labi sa cinco mil na voto ni Alcalde Nelson Legacion asin sa tolong magraralaban sa eleksyon sa 2022 nagtutubod siya na makakalamang siya nganing ganahon an resulta kan pirilian.

An TT pinapangenotan ninda Tato Mendoza, candidatong alcalde an saiyang ka-tandem si Toots Dequiros, an mga candidatong consejales kinababalehan ninda; Gina Albao, Ed Gregorio, Allan San Juan, Mario Salak, Solomon Sales, Nathan Sergio, Arturo Tuy, Mon Baturiano, Sim Adan Jr. asin Toto Diokno.

Afuera kan TT an Coalition for Good Governance ‘‘Yes Team’’ kan Bongat- Bragais tandem asin Team Naga ninda Legacion- De Asis tandem nagpahayag man kan saindang bilog na suporta sa candidatura ni VP Robredo. (dpa)