top of page

Ronot na an Uni-team!



Dae man lamang ako nangangalas kan biglang paghaklas ni VP Sara Duterte-Carpio sa panguiguin Secretaria kan Departamento de Edukasyon asin sa paghali niya sa gabinite ni Presidente Ferdinand Romualdez Marcos Jr o PBBM.


An nangyari garamitan.


Si dating Presidente Rodrigo Roa Duterte nagkandidato asin nanggana kan 2016 sa kargong Presidente na dae piglalaoman.


Gana si Duterte laban sa dakul na kandidato pati kontra ki dating Vice-Presidente Jojo Binay, daog si Marcos para Vice-Presidente laban sa Bicolanang si Leni Gerona Robredo nin labi sanang 250 mil na boto.


Milagro!!! Dakulaon na milagro.


Nag-guilid nguna si Bongbong sa laog nin anom na taon. Nagpara-protesta sana na mayong nangyari. Naghalat nin tamang timing. Kan 2022 si VP Leni na an nagsabat kontra ki Bongbong Marcos. An Bicol solido sa likod ni VP Leni huli ta suportado kan grupo ni dating Presidente Noynoy Aquino asin dating Senador Mar Roxas. An sabi surog pa si Madam Leni kan Estados Unidos ta balik-balik siya sa America kan siya Vice-Presidente. An mga aki niya duman niya pa pigpa-ereskwela.


Saro naman na dakulang milagro ta nadaog si Leni nin dakulaon na baya apesar na si Bongbong pigpara-arapod kan kalaban sa politika na parahabon, putikon asin kurakot.


Nagtukaw si Marcos Jr sa Malacañang bilang hefe ejecutivo asin speaker o pamayo kan camara de representantes an saiyang pinsan na si Ferdinand Martin Romualdez kan Leyte. Si Speaker Romualdez aki ni Kokoy Romualdez na tugang na nguhod ni Mrs. Imelda Romualdez Marcos na ina ni PBBM. An chairman kan puderosong Appropriations Committee kan Congreso iyo an Bicolanong si Congressman Zaldy Co kan Ako Bikol partylist.


Duwang bulan paka eleksyon nagbakasyon ako sa Canada asin pagpuli ko pakalihis nin tolong bulan nawara ta hinali si Atty. Trixy Cruz Angeles bilang press secretary. Ngalas ako. Grabe.


Kan halian nin dakul na pondo si VP Sara kan camara de representantes nagpoon na akong magduda na may nangyayari sa itaas. Pigtutuksilan na an Vice-Presidente asin nag-react na an saiyang ama na si dating Presidente Digong. Siya taga-Mindanao asin primerong Presidente hali sa parteng idto kan Pilipinas, nagpatakot siya na na isusuway na an Mindanao sa Luzon asin Visayas.


An deuterium dakulang kayamanan kan Pilipinas na mas mayaman pa sa krudo asin gasolina na nagtatao nin enerhiya sa Pilipinas makukua sana sa irarom ka kadagaan kan Mindanao, mayo nang iba.


An mga Marcos loyalists digdi sa Bicol nag-oorganisar na nin grupo na matao nin pakinabang sa deuterium, kun ano yan dae ta pa aram.


Luway-luway nang pigpipitik kan mga congressmen/congresswomen si Sara asin an gabos na problema kan nasyon ipigbabasol na sa administrasyon kan saiyang ama orog na idtong garadanan durante kan drug war o giyera kontra droga ni PRRD. Gusto na nganing ipa-atubang sa International Criminal Court (ICC) an dating Presidente huli sa pig-aapod na extra judicial killings.


Risang marhay an kamot kan admistrasyon sa mga kaso asin sahot na ipigdadaklag sa administrasyon ni Duterte na kun iisipon kun mayo si Duterte mayong Marcos sa Malacañang.


Si Duterte pa an nagsugo na ilubong an bangkay kadtong dating Presidente Ferdinand Edralin Marcos Sr, sa Libingan ng mga Bayani. Si FM Sr an nagdeklara nin martial law asin pig-aapod na diktador kan oposisyon. Dakulang utang na boot kan pamilya Marcos sabi mismo ni Senadora Imee Marcos Manotoc na tugang ni PBBM an guinibo ni Duterte na dae guinibo kan mga naenot na presidente lalo na ni Cory Aquino.


Sa laog nin labing duwang taon padagos an pagduwagui kan presenteng admistrasyon sa dating Presidente. Pati an problema sa West Philippine Sea o South China Sea ibinabasol pa ki Digong ta maka-Tsina daa siya.


Sa totoo lang si Digong dae nungka nagtumak sa kadagaan kan America, maski sa Guam o Hawaii o Alasca sa laog nin anom na taon kan siya an Presidente kan Pilipinas.


Sa ibong na lado si PBBM pakatukaw tulos sa Malacañang pulus-pugos tulos magbiyahe sa Washington DC. Ta nagsaludar ki Presidente Joe Biden. Sa sintikan kan Tsina asin America risang marhay na kampi ini ki Uncle Sam.


Mala baga ta siyam na an EDCA sites kan America sa Pilipinas ngunyan.


An igwa si Duterte na mayo si PBBM iyo an pig-aapod na “Independent Foreign Policy”, mayong kaiwal pero an gabos na nasyones kan kinaban kaamigo kan Pilipinas.


An pinaka-grabe an mga kaso na ipigsasampa kan administrasyon laban ki Pastor Apollo Quiboloy na kaalyado ni Digong pero kalaban ni Uncle Sam.


Gusto nang ipadakop si Quiboloy asin ikunkon sa kalabos o ipadara sa America tangarig duman mapriso.


Dae na ini kinaya ni VP Sara.


Antabayan an grabeng barakbakan sa politika digdi sa Pilipinas sa masunod na apat na taon sagkod 2028 presidential election.

Comentarios


bottom of page