Rotating brownout abot pa sa Mayo 31

Sagcod pa sa bulan na Mayo 2021 an problema sa pagnipis kan suplay nin kuryente mantang nagpapadagos pa an bulan nin tag-init na ciertong magkakaigwa naman nin mga ‘‘rotating brownout’’ asin apektado an Camarines Sur II Electric Cooperative (Casureco II) maging iba pang cooperativa nin electricidad sa Bicol.


Dai pa kabale digdi kun igwang ginigibong mga maintenance sa linya nin kuryente an cooperativa asin National Grid Corporation of the Philippines (NGCP).


Ini an mga pahayag ni Rinner Bucay opisyal na parataram kan Casureco II afuera kan mga paising brownout kan NGCP kan nakaaging semana igwa pang mga insidente nin biglaan na pagkawara nin suplay nin kuryente.


Kun nagkakaigwang mga biglaan na rotating brownout na mayong paisi an NGCP, alagad an anuncio sa power service interruption sa apektadong franchise area huri nang narerecibe kan cooperativa na hale Communication Office kan NGCP sa paagi ni Sr. Manager Pedro Borja Jr.


Igwang mga insidente nin pag-shut down kan planta kun nagkakaigwa nin halangkaw na pangangaipo kan suplay kan kuryente huli ta grabe naman an init kan panahon, sabi pa ni Bucay.


Kun nagkakaigwang harahalawig na brownout huli kan posibleng nagkukulang an suplay sa enterong Luzon na nagiging dahilan na isakripisyo an ibang franchise area.


An nangyayari sana ta pinapalibre sa rotating brownout an mga pribado asin pampublicong hospital nganing dai ma-apektaran an mga pasyente.


Sinabi pa kan Casureco II an problema sa rotating brownout perming nangyayari kun panahon nin tag-init. (dpa)