Rotational brownout sasapuon pa sa Luzon

Sagcod na padagos an mainit na kamugtakan nin panahon mangyayari an pagnipis kan suplay kan kuryente asin dai malilikayan an rotational brownout sa Camarines Sur II Electric Cooperative (Casureco II) asin mga cooperativa nin electricidad sa enterong Luzon.

An mga cooperativa nin electricidad asin National Grid Corporation of the Philippines (NGCP) igwang advance notice sa mga cooperativa kun nuarin magkakaigwa nin brownout sa ginigibo nindang regular na maintenance kan mga linya.

Alagad an biglaan na mga pagkawara kan suplay nin kuryente mayo na sa saindang kontrol envez huli kan rotational brownout sa Luzon.

Ini an piglinaw ni Rinner Bucay, opisyal na parataram kan Casureco II sa tahaw kan dakul pang mga miembros-consumedores an nagrereklamo dawa anong oras biglang nawawara an kuryente sa saindang coverage area.

Igwa man pinapadarang noticia an NGCP sa rotational brownout alagad kadakle kaini huri nang narerecibe kan saindang opisina maging kan iba pang mga cooperativa nin electricidad sa Bicol, sabi pa ni Bucay.

Sinabi pa kan Casureco II kun nagkakaigwang relokasyon kan mga electrical post sinda igwang advance notice sa consumedores.

Kun naputol sinda kan power supply kun may paisi sa rotational brownout pig-iibitaran na dai makaayon an mga pribado asin pampublikong hospital mantang dakul an mga pasyente na puedeng ma-apektaran bako lang sa mga Covid wards.

Duda man an mga cooperativa sa sarabay na pag-shutdown kan doceng planta nin kuryente na nagiging dahilan an sobrang init kan panahon kaya nagkakaigwa nin pagnipis kan kuryente.

Huli kaini, kaipuhan an rotational brownout an apektado an publico alagad an interes kan mga power supplier iyo an nagdadanay nganing magpalangkaw nin tarifa. (dpa)