RT Law dapat enmiendahan - Bordado, Ako Bicol Partylist

Sarong re-electionista lehislador asin duwang nominees nin partylist sa Bicol an nagpahayag na dapat nang enmiendahan sa masunod na congreso an Acta Republica 11203 na mas midbid sa Rice Tariffication Law (RTL) huli ta dai man nakakatabang sa sektor nin paraoma envez pagkalugi an saindang inaatubang mantang hababaon an presyo kan paroy.


Si Congresista Gabriel H. Bordado Jr. kan tercer distrito kan Camarines Sur enot nang nag-asegurar na sa masunod na 19th Congress saiyang papangenotan nganing ma-enmiendahan an RA 11203 na mas paborable sa paraoma.


Sa pinaapod na press conference sa Ciudad nin Naga kan nakaaging aldaw ninda Ako Bicol Partylist nominees Atty. Raul Angelo Bongalon asin Atty. Ramiro Borres saindang pigpangako na kun sinda manggana sa maabot na eleksyon komo partylist kan Bicolano saindang itutulod an pag-enmienda kan controvercial na ley na inaprubaran ni Presidente Rodrigo Duterte kan Febrero 14, 2019.


Sinabi ni Bordado sa saiyang pakikipag-ulay sa ibang lideres kan mga paraoma sa saiyang sakop na distrito padagos an agrangay ninda huli ta parating apektado an saindang inaning paroy na nagpaparababa an presyo arog na ngunian nin tag-uran mas lalong binabarato kan mga kumprador.


Ngunian na 18th Congress dificil pang makalusot ta an presenting administrasyon iyo an nasa likod kan Rice Tariffication Law na an bill pigpadrenohan ni Senator Cynthia Villar sagcod na aprubaran sa senado.


Alagad pigseseguro ni Bordado na sa masunod na 19th Congress saro na sa saiyang tatawan prioridad mantang pig-aadalan na niya an ‘‘pros and cons’’.


Ipinahayag pa kan duwang nominees kan Ako Bicol Partylist saindang na-iintindihan an kamugtakan kan mga paraoma ta iyo an dejado sa RA 11203 asin dapat lang suportaran asin tabangan kan saindang reclamo contra sa ley.


Sa magkasuhay na mga pahayag, saindang sinabi na an presyo kan paroy barato alagad an bagas padagos na naglalangkaw.


An RTL an napapaboran sana an mga higanteng rice traders huli ta buelo an saindang pag-angkat nin bagas asin iyo pa an nagdidicta kan bagas sa mercado.


Kan nabubuhay pa si Silvestro Bonto, presidente nasyonal kan Confederation of Communal and National Irrigators Association of the Philippines saiya man na pigtuyaw an RTL huli ta patolong taon apektado an sektor nin paraoma mantang perming hababaon an presyo kan paroy.


Sa computation kan paraoma nalulugi sinda na an P4.00 hasta P5.00 cada kilo dawa na libredo na an irrigation system kan NIA.


Kan panahon na nagbabayad sinda sa irrigation fee dawa mayong RTL alagad marhay an presyo kan paroy bakong palugi cada kilo.


An dahilan kan gobierno an bilyones peso na nakokolecta sa buwis sa tariff hale sa negosyante nin bagas an makikinabang an mga paraoma enforma nin makinarya sa pag-oma alagad limitado man an natatabangan. (DPAureus)