RT-PCR, booster shots sa biyahero dapat halion na

Posibleng halion na kan gobierno an pig-mamandong magpa RT- PCR o antigen test an mawot magbiyahe paluwas asin palaog sa Filipinas an mayo pang booster shots nganing dai padificilan asin dagdag pang gastos sa mga kahimanwa maging sa turista.

Ini oras na magpaluwas naman nin executive order si Presidente Ferdinand Marcos Jr. na halion na an sinambit na mga rekisitos kan gobierno kasunod kan kahagadan ni Congresista LRay Villafuerte kan segundo distrito kan Camarines Sur.

Si Villafuerte nagsabi an paghali kan mandatory booster shots asin Covid- 19 testing sa mga dayuhan na bisita nganing tugotan an sektor nin turismo asin ini dakulang bagay para sa pag-angat sa economia kan nasyon.

An bagay na ini saiya man pinapaliwanag sa saiyang paglibot-libot sa nagkaperang banwaan sa segundo distrito kan provincia.

Saiya pang sinabi nganing makahawas an nasyon epekto kan matolong taon nang pandemya, kaipuhan mabawasan na an mga estrictong pig-iimplementar na ‘‘restrictions’’ sa mga biyaheros.

An mga dayuhan na biyaheros nasibog kan saindang paglaog sa Filipinas huli kan sagcod sa ngunian yaon pa an mga pinagbabawal kan gobierno na dapat mabawasan nganing dagos-dagos nang makabangon sa economia.

Napag-araman pa kan lihislador kan segundo distrito kan Camarines Sur sa ginibong survey kan travel publication Conde Nast Traveler (CNT) nagpapaheling na an Filipinas iyo kuta na an enot sa ASIA sa pagbukas sa turista, alagad nahulog sana sa ika-30 sa mga nasyones sa kinaban.

Segun pa saiya enot niyang pigtulod na gibohon nang voluntary an paggamit nin face mask indoors na nangyari sagcod nagpaluwas nin executive order si Presidente Marcos. (dpa)