RTL dapat enmiendahan sa masunod na administrasyon

Pinapaboran kan National Food Authority (NFA) an plano kan nagkaperang mga lehislador na ma-enmiendahan an Rice Tariffication Law (RTL) sa masunod na 19th congress na iyo man an kamawotan kan sektor nin paraoma.

Si Domingo Pura, branch manager kan NFA Legazpi City-Catanduanes nagpahayag na sana gibohon kan mga lehislador bako sanang mga pangako ngunian na panahon nin eleksyon asin dapat mangyari na sa masunod na administrasyon.

An RTL na-aprubaran sa senado matapos pagdrenohan ni Senador Cynthia Villar bilang Chairman kan Committee on Agriculture sa pagtubod na makakatabang sa sektor nin paraoma asin konsumedores, alagad kabaliktaran nagpapalugi sana sa pobreng paraoma huli kan nagparababa an presyo kan paroy.

An nakikinabang iyo an mga darakulang rice traders na iyo an nag-aangkat nin ribo-ribo sako nin bagas asin nagdidikta kan presyo sa mga mercado sa halangkaw na presyo.

Kan iimplementar an Rice Tariffication Law kan Febrero 2019 haros cincuenta por ciento kan mga empleados kan NFA an nawaran nin trabajo nagsabay pa sa mga negosyante na nagsara kan saindang establisimiento huli kan duwang taon na pandemya.

Hinale na kan RTL an pagsuplay nin bagas kan NFA sa mga mercado na naging resulta makabuelo an halangkaw na presyo kan commercial rice huli ta mayo nang kumpetensya hale sa ahencia.

Si Congressman Gabby Bordado kan tercer distrito kan Camarines Sur nagpahayag na sa masunod na 19th congress isusunad niya na ma-enmiendahan an RTL na dai apektado an sektor nin paraoma.

An Sumilao Farmers na hale sa Bukidnon kan maghapit sa Ciudad nin Naga nagpahayag sa media conference na si presidential candidate VP Leni Robredo nagpangako sa sainda na dapat ma enmiendahan an RTL nganing makabangon an sektor nin paraoma.

Sa ngunian an presyo kan paroy nag-aabot na sana sa P11.00 hasta P12.00. (dpa)