Ruta kan commuter train papaantoson sa Lupi, CSur

Welcome asin dakulang pasasalamat sa manijmiento kan Philippine National Railways (PNR) sa plano na makaantos na sa Lupi, Camarines Sur an ruta kan commuter train sa mga maabot na bulan.

Ini an mga pahayag ni Bise Alcalde Noel Agravante sa tahaw kan padagos na ginigibong rehabilitasyon sa mga linya kan perokarril haling Sipocot, Camarines Sur hasta sa lomang Lupi PNR Station.

Kun marealisar na makasundo na sa saindang banwaan an viaje kan commuter train makakatabang sa dakul na pasajeros maging sa paraoma na may dara kan saindang produkto nganing ipabakal sa mercado, sabi pa ni Agravante.

Dai palang nahahaloy sinabi sa miembros kan media ni PNR General Manager Deovanni Miranda na igua na sindang fondo para sa rehabilitasyon kan PNR Station sa Libmanan, Pili,asin Lupi sakop kan premir distrito kan Camarines Sur.

Alagad dai pang exactong bulan pinapaluwas an manijamiento kan PNR Bicol kun nuarin bubukasan an linya kan Naga-Lupi mientras nagpapadagos pa an pagpakarhay kan mga linya asin kabale sa prosupuesto iyo an rehabilitasyon kan PNR Station sa sinambit na mga banwaan.

Kabale sa mga papakarhayon iyo an atop, opisina, comfort room asin maintenance dorms.

Sa ngunian an ruta sana kan commuter train iyo an Naga, Pamplona, Libmanan sundo sa Sipocot.

Haros aroaldaw parating durukotan na an pasajeros sa cada kotse kan train huli ta barato an flete kumpara sa jeepney maging pampasajerong van.

Kan nakaaging semana ginibo na si inagurasyon kan bago asin pinahiwas na PNR Station sa Pili, Camarines Sur.

Dinagdag pa kan PNR na mientras na padagos na an viaje sa Naga-Legazpi magpapadagos an saindang rehabilitasyon sa mga linya nganing maibuelta si duwang veces na viaje sa Naga-Legazpi cada aldaw.