Ruta kan PNR Naga-Lupi masikad sa Noviembre 5

Dakulang bentaje sa mga pasajeros kan Lupi, Camarines Sur an pagsikad kan regular na viaje kan Philippine National Railways (PNR) gikan sa Ciudad nin Naga sagcod Lupi poon Noviembre 5, 2025.

Si Bise Alcalde Noel Agravante nagpahayag na an desisyon kan manijamiento kan perrokaril na makaantos sa saindang municipalidad an ruta bako lang paborable si mapasiring sa Ciudad nin Naga alagad si mga empleados kan saindang LGU na aroaldaw nagpupuli sa kataid nindang banwaan nin Sipocot.

An bise alcalde juespe de onor sa ginibong inagurasyon kan Lupi PNR Station kan Septiembre 2025 kan siya nagtutukaw bilang acting mayor.

Alagad dinagdag pa kan opisyal an ruta kan Bicol Express Naga-Lupi Viejo sana asin saindang hinahagad sa manijamiento na makaantos sa Colacling, Lupi mantang yaon digdi an dakul na pasajeros.

Magiging kumportable pa sa pasajeros huli ta air conditions an tren na iguang sarong oras asin 40 minutos haling Lupi sagcod sa Naga.

Sinabi man ni PNR General Manager Deovanni Miranda an pagbuelta kan viaje sa railroad towns kasunod kan kasugoan ni Presidente Ferdinand Marcos Jr asin DOTr Secretary Giovanni Lopez na dapat hidalion an rehabilitasyon kan mga linya asin estasyon kan perrokaril.

Tolo an regular na viaje aroaldaw alagad saindang iimplementar an discuento sa mga estudiantes, PWDs asin senior citizen.

Bako lang sa Camarines Sur an ruta kan Bicol Express envez igua nang Naga-Legazpi sa provincia nin Albay.