Ruta kan PNR planong paantoson sa Quezon
- Bicolmail Web Admin
- Jun 21
- 1 min read
Piglalaoman na makakaantos sa provincia kan Quezon an ruta kan Philippine National Railways (PNR) sa pamamayo ni General Manager Deovanni Miranda matapos makumpleto an rehabilitasyon kan Binahan Bridge sa Ragay, Camarines Sur.
An sinambit na tulay kan perrokaril dakula si danyos huli kan bagyong Kristine kan Oktubre 2024 asin ini an masumpay kan viaje sa train hale sa Bicol pasiring sa Quezon na saro sa tinawan prayoridad kan manijamiento na natapos an patrabajo sa laog nin duwang bulan. Pinapusog an tulay saka niribayan si mga lomang trabesa bilang suporta sa programa ni Presidente Ferdinand Marcos asin kan DOTr na mapakaskas an rehabilitasyon.
Sa ngunian an ruta kan commuter train hale Naga sundo sana sa Sipocot, Camarines Sur alagad an tulay makakatabang nganing magderetso na an ruta hale sa Camarines Sur sundo sa Quezon na iguang distanciang 99 kilometros.
Sa ngunian perang bulan nang nakakaagi nakabuelta na si ruta kan Naga- Legazpi na temporayong na suspende matapos madanyaran kan nakaaging bagyong Kristine.
An rutang Bicol-Manila haloy nang pinangako kan mga nakaaging presidente kan nasyon mala ngani si planong iimplementar na PNR – South Long Haul Project kan administrasyon Duterte sagcod sana sa ‘‘drawing’’ kan magpalyar si plano na mauutang nin fondo sa nasyon kan China.
An plete kun malunad sa train mas barato kun ikukumpara sa pampasajerong bus na abala pa an viaje huli kan trafico asin raraot pang national road na Andaya Highway dating Quirino Highway.
Comments