Rutang Bicol-Calamba kan PNR sagcod sana sa pangeturogan

Nagbuelta na an viaje kan Philippine National Railways (PNR) sa rutang Naga-Legazpi alagad an piglalaoman kan mga Bicolano na sa dai mahahaloy na panahon mabubuhay na an rutang Bicol-Calamba alagad harayo pa sa posibilidad.

Napundo an rutang Naga-Legazpi huli kan bagyong ‘Kristine’ kan Oktubre 2024 matapos sanupon nin tubig baha si mga piyesa kan bagon mantang an mga binakal na bagong piyesa binakal pa sa luwas kan nasyon asin an iba sa Manila. An viaje nagbuelta sana kan Febrero 26, 2025.

Ini an napag-araman sa manijamiento kan PNR Bicol na saindang pinupontohan na dai pa mangyayari huli ta dakol pa ngani an mga hihirahayon na mga linya kan perokarril haling Lupi, Camarines Sur sundo sa provincia nin Quezon. Saro ini sa dahilan ta dai pa nakaka-abante an ruta kan commuter train sa Ragay PNR Station, Ragay, Camarines Sur. An dalagan sana kan train haling Naga-sundo sa Sipocot PNR Station.

Kan mga nakaaging bulan nagluwas sa social media kan 2024 na madali nang magbuelta an rutang Bicol-Calamba alagad segun sa PNR ‘‘fake news’’ an sinambit na impormasyon.

Magigirumduman sa administrasyon ni dating Presidente Rodrigo Duterte nakatalaan kutang mag-utang sa China nganing gamiton na fondo para sa modernization project kan perokarril alagad nagpalyar si negosyasyon sagcod sa presenting administrasyon ni Presidente Marcos mayo pang plano kun nuarin ipapadagos an proyekto.

An proyekto kun nangyari para sa PNR South Long haul line – (Manila-Bicol) na may labang 653KM.

Dinagdag pa kan PNR Bicol an oras sa rutang Legazpi-Naga alas 4:49 aga mantang alas 5:30 nin hapon pabalik sa Ciudad nin Naga. An flete Php150 kumpara sa pampasajerong van sa kaparejong ruta Php200.