Rutang Naga-Legazpi kan PNR ibubuelta sa Dec 25

An piglalangkag na pagbuelta sa viaje kan Philippine National Railways (PNR) sa rutang Naga-Legazpi mawot mangyari kan manijamiento antes kan aldaw nin kapaskohan ngunian na taon.

Ini an kumfirmasyon sa Bicol Mail ni OIC Division Manager for Operations Joel Dajac kan PNR Bicol sa tahaw kan nagpapadagos na clearing operation sa ruta na aagihan kan viaje poon sa Ciudad nin Ligao sundo sa Ciudad nin Legazpi.

Dai kabali sa clearing operation an mga harong kan informal settlers sa gilid kan perrokaril envez si may mga extension sa saindang atubangan harani na sa riles. An mga personajes kan PNR regular an saindang ginigibong inspeksyon tanganing maseguro na mayo nang apektado oras na makaantos an viaje sundo sa Ciudad nin Legazpi.

Enot nang nagbuelta an rutang Naga-Ligao kan Hulyo 31, 2023 na nagdadakul na an pasajeros asin maninigo nang makaantos sa Legazpi na saro sa lugar nin turismo sa Bicol, sabi pa kan PNR.

Magigirumduman an operasyon kan perrokaril sa Bicol sa Naga-Legazpi nagpahingalo kan Abril 2017 huli kan pagkulang-kulang nin rolling stock.

An istasyon na kabali sa flag stops poon sa Ciudad nin Naga, Pili, Baao, Bato, Nabua, gabos digdi sa Camarines Sur mantang sa Albay sa mga banwaan kan Matacon, Polangui, Oas asin Ligao.

An duwang viaje kan train cada aldaw sa oras sanang alas 5:30 nin aga hali sa Ligao sundo sa Naga mientras na pagkahapon alas 5:30 nin hapon hali sa Naga pabalik sa Ligao. An rutang ini may distanciang 67 kilometros sa laba kan riles. Gamit an sarong diesel hydraulic locomotive (DHL) na igwang limang coaches na kayang magpalunad nin 1,300 na pasajeros.

Nagdadakul na an mga pasajeros huli ta barato an flete kumpara sa pampasajerong bus.

Digdi sa Camarines Sur an commuter train na rutang Naga-Sipocot may limang taon nang operasyon. (dpa)