SA 2023 ANNUAL BUDGET KAN NAGA CITY: Mantenido na billionaire city dawa ginuntingan an budget

Magpapadagos na bilyonaryo an lokal na gobierno kan Ciudad nin Naga dawa ginuntingan nin milyones pesos an 2023 annual budget matapos aprubaran sa huring sesyon regular kan Sangguniang Panlungsod kan Martes, Deciembre 20, 2022.

Hali sa dating P1,645,390.273.64 sa 2022 annual budget alagad sa masunod na 2023 annual budget igwa na sanang P1,511,570.780 kasunod kan pagkaltas nin P133,819,493.64 o ocho porciento, sabi sa mga pahayag sa Bicol Mail ni Consejal Jess Albeus, Chairman kan Committee on Finance and Appropriation sa SP.

Sinabi pa ni Albeus bako lang LGU Naga an binawasan nin budget para sa sunod na taon alagad gabos na LGUs sa nasyon kasunod kan pagbawas kan saindang National Tax Allocation o dating Internal Revenue Allotment.

An desisyon kan Department of Budget and Management (DBM) mantang apektado an nasyon sa hababang koleksyon sa buwis sa laog kan duwang taon epekto kan pandemya na nagbagsak pa si economia na nagbawas pa nin mga empleado an ibang mga kumpanya.

Dinagdag pa kan pamayo kan appropriation committee an desisyon kan ciudad na magkaigwa nin paghigot paha sa paagi kan pag-gunting nin fundo sa lambang departamento asin iba pang mga opisina kan City Hall.

An 2023 proposed annual budget nagagi sa mga public hearing asin committee antes na-aprubaran sa en banc session.

Paghali sa travelling expenses sa ibang departmento asin iba pang operation expenses. An lanub kan opisina ni Alcalde Nelson Legacion binugtakan nin nakasurat na ‘‘No Hiring’’ alagad sinabi kan ibang department head na igwa man giraray kinukuang job order na empleados an jefe ejecutivo.

Alagad dawa dakulang fondo an mawawara sa City Hall, an alcalde kan ciudad nakahanap nin ibang mga proyekto sa mga ahencia nasyonal.

Nagpoon na makasakat bilang sarong billionaire City an Ciudad nin Naga sa administrasyon ni dating Alcalde John Bongat asin nagpapadagos sa administrasyon ni Alcalde Legacion. (DPAureus)