SA 2026 ANNUAL BUDGET KAN NAGA: P2.1-B inaprubahan kan SB, naglangkaw nin 12% vs '25

Lusot sa huring sesyon regular kan Deciembre 2025 sa Sangguniang Panlungsod kan Ciudad nin Naga sa pamamayo ni Bise Alcalde Gabriel H. Bordadio Jr. an P2.1-B na 2026 annual budget na naglangkaw nin 12% o P300-M kumpara kan 2025 budget na Php1.8-B alagad maiinaan nin P6.42-M bilang monthly amortization o total na P77-M para sa doceng bulan na utang kan ciudad sa sarong bangko.

Si Consejal Elmer Baldemoro, Chairman kan Appropriation Committee sa SP nagsabi na ‘‘unanimous’’ an pagkaka-aprubar kan annual budget alagad kun iguang dugang na P300-M dai man maimponer nin dugang na buwis an City Hall envez maghahale sa mga economic enterprises.

An may pinakalangkaw na prosupuesto iyo an Education and empowerment na nagcacantidad nin Php209-M; nagsunod an Health o programa sa salud -Php181-M; Environment, infrastructure and housing – P154-M mantang sa Transparent and Digital Governance – Php92-M. Sa Salary and Wages iguang total na P900-M.

An fondo sa infrastraktura dai na ngona natawan nin prioridad alagad igua man giraray proyekyo digdi kabale na an pagpakarhay kan mga drainage nganing maibitaran an mga flash flood.

Kan nagtalikod na administrasyon dating Alcalde asin ngunian Diputado Nelson Legacion may utang na P350-M na ginagamit na fondo para sa bagong Naga City General Hospital mantang igua nang dating utang ciudad nin P100-M para sa programa sa urban poor.