SA 2ND TRILLION PESO MARCH: Prayer protest rally sa Nov 29 preparado na

Ni DPA/Paulo Papa

Andam na an civil society groups, Archdiocese Caceres, Diocese of Libmanan, iba pang religious groups, estudiantes, magin iba pang sektores sa Bicol sa gigibohon na Second Trillion Peso March, sa Nov 29 para sa massive prayer-protest rally laban sa organisadong kurapsyon na mayormente apektado an namamanuan Filipino.

An dakulang protesta pagpaconsiencia sa mga envueltong opisyal kan mga ahencia de gobierno alagad piglinaw na bakong politica.

Piglalaoman an ginatos na ribong Bicolano an maparticipar nganing ipaheling an saindang pag-denuncia laban sa haloy nang isyu sa kurapsyon bako lang agencia de gobierno an envuelto envez maging mga politico.

An protest rally magtitiripon sa Basilica Minore ni Nuestra Señora de Peñafrancia, sa Ciudad nin Naga alagad an mga participantes magkakaigua ngona nin paglibot sa mga mayor na calle kan Ciudad nin Naga ala 1:00 nin hapon hale sa manlaen-laen na escuelahan, banwaan asin simbahan mantang an asemblia gigibohon sa Basilica alas 3:00 nin hapon.

Alagad an Naga City Police Office asin PPO Camarines Sur nag-aviso sa mga partisipantes na magsunod sa leyes asin likayan na magbalgar sa diretso kan iba.

Segun ki PPO Spokesperson PCapt Liza Jane Alteza, nagpapasalamat si PCol. Virgilio Olalia, an director kan provincial command, sa mga namamanwaan na nagpartisipar sa naenot na martsa kan simbahan kan Oktubre.

Dugang pa ni Alteza na pigsambit kan koronel na nagin matoninong an nagin martsa kan Oktubre na pigpangenotan kan Arkidiyosesis kan Caceres.

Alagad liwat na pigpapagirumdom kan PNP – Camarines Sur na magin masinunod-sunod man guiraray sa ley mantang pigpapangatamanan an diretsong magtaram tumang sa gobyerno.

Laen pa kaiyan, likayan na mahabonan dahil sa mga personang may intensyong maghabon durante kan martsa.

Sa fetsa 29 ngonian na bulan, aldaw nin Sabado gigibuhon liwat an Trillion Peso March na popoonan sa Ateneo de Naga University, Naga Metropolitan Cathedral, Plaza Quince Martires, Immaculate Concepcion Parish asin tatapuson sa Peñafrancia Basilica Minore sa paagi kan programa asin sabi, Santa Misa.

Kan fetsa uno kan Oktubre, taon presente, pigpartisiparan kan labi sa 22,000 na katao an Trillion Peso March komo pagkondenar sa ngana-ngana nang kurapsyon katakod kan isyu sa flood control projects.

Si Alkaldesa Leni Robredo nagbuyagyag na ini maatender sa aktibidad alagad sa pag obserbar sana

Susug saiya, dae maninigo na bugtakan nin politika asin dae pwedeng gobyerno an mangenotan kan siring na tiripon nin tao kundi an pribadong sektor.