SA BAKUNA VS ASF: Bicol dai kaayon sa papadarahan suplay

Lima nang provincia sa Bicol apektado na kan nagbabalik na African Swine Fever (ASF) na igua nang total na 472 na pig-depopulate na mga orig kan Agosto saka Septiembre 2024 alagad dai pa kaayon sa mapapadarahan vaccines sa virus sa hayop envez prayoridad kan central office kan Department of Agriculture an mga municipalidades sa Batangas na pinasa-irarum sa state of calamity huli sa mga caso kan ASF.

An Camarines Sur iyo an may halangkaw na caso asin apektado digdi an onseng municipalidades. An mga apektadong banwaan digdi iyo an Libmanan, Baao, Bula, Pili, Nabua, Ocampo, Presentacion, Tigaon, Minalabac asin Ciudad nin Iriga.

Sa pinakahuring datos kan DA Bicol, sinabi ni Lovella Guarin, regional spokesperson kan ahencia an caso nagwarak na sa nagkaperang mga banwaan kan Catanduanes, Albay, Sorsogon, Masbate asin Camarines Sur na may dakul na municipalidades.

Nag-abot na sa Manila hale sa Vietnam an diez mil doses kan ASF vaccines na ididistruber nin libre sa red zone areas sa Batangas.

Nag-agi na sa pag-aadal sa laboratoryo kan Food and Drug Administration (FDA) kan 2023 na naglansar na kan grupong ‘’Taskforce Moccus’’, sarong organizational unit kan ahencia na nagseguro na ‘safe’ o mayong epekto sa salud kan tawo asin efectivo an calidad kan ASF drugs and vaccines, nganing ma-control an naglalailang virus sa ataman na orig.

An virus sa orig delicadong helang na madaling mag-ulakit mala ngani halangkaw an mortality rate na nakakaapektar sa dakul na hog raisers.

An mga banwaan na clasificadong red zones an padagos pig-momonior mantang nagbugtak nin mga animal check point sa mga barangay sa tabang kan mga lokal na gobierno.

Hinagad kan DA an cooperasyon kan mga LGUs na iimplementar an Bantay ASF sa barangay o inaapod BABay ASF program nganing maibitaran asin macontrol an pagbalyong mga lugar kan virus.

Nganing macontrol an pag-ulakit kan ASF an DA nag-depopulate na kan mga hayop na yaon sa laog kan 500-meter radius sa mga apektadong lugar.

Sa ngunian an nasa top 3 province sa virus sa hayop iyo an North Cotabato, Mindoro Occidental asin Batangas.