SA BAKUNA VS COVID-19: LGUs problema an manga “undecided”

An bakuna contra sa coronavirus disease (Covid-19) bakong problema kan mga lokal na gobierno alagad an mapabakuna an posibilidad na magduwa-duwa sa tahaw kan mga negativong inpormasyon sa salud oras na matudokan na nin bakuna.


Dakul na mga residentes kan barangay an padagos na ‘‘undecided’’ asin an dapat gibohon iyo an mahiwas na inpormasyon sa publiko nganing maintindihan an kahalagahan kan bakuna contra sa virus.


Ini an mga pahayag ni Alcalde Eduardo Severo kan Calabanga, Camarines Sur mantang an nakakaabot na report sa saiyang opisina an nagsasabi na dakul an mga dai interesado na magpabakuna sa dahilan kan mga negativong inpormasyon kan mga natutudokan kan bakuna.


Sa Ciudad nin Naga nagkakaigwa nin survey sa cada harong sa mga barangay alagad sa inisyal na report kan Barangay Health Workers (BHW) mayoria an nagpapahayag na ‘‘undecided’’ dikit sana an andam magpabakuna kun yaon na an vaccines contra Covid-19, sabi Alcalde Nelson Legacion.


Nagsugo na an jefe ejecutivo kan ciudad sa mga opisyales de barangay na magtabang sa pagpaliwanag kun tano ta kaipuhan magpatudok bakuna contra Covid -19.


Sa enot na nakuang inpormasyon sa resulta kan survey kan mga BHW sa Naga siring kan barangay San Francisco asin Concepcion Pequeña mas dakul an mga ‘‘undecided’’ maging an ibang miembros kan BHWs huli sa negativong epekto base sa saindang mga naheheling asin nadadalan sa television maging nadadangog sa mga radyo.


An kaparejong problema iyo man an inaatubang kan LGUs sa Camarines Sur.


Si Liga President asin Ex-officio member kan Sangguniang Panlungsod kan Ciudad nin Naga nagkumfirmar na nagkukunducir nin mga survey an BHW nganing isumiter sa City Health Office an resulta na saro sa babasehan sa implementasyon kan vaccination program oras na mag-abot na an AstraZeneca na iyo an babakalon kan lokal na gobierno kan ciudad.


Dinagdag pa ni Severo na igwa sindang standby fund na cinco hasta diez milyones peso na pambakal nin bakuna afuera kan dugang na suplay na hale sa gobierno nasyonal.


Huli kaini nagtutubod siya na mayo nang problema sa suplay kan bakuna alagad an problema yaon sa babakunahan.


An Departamento de Salud mandato sa LGUs na iimplementar an vaccination program. An saindang aksyon na magtarabangan an gabos na sektor sa pagpaliwanag kan importancia kan bakuna.


An ginigibo ngunian kan LGUs iyo an profiling nganing isumiter sa DOH antes mag-abot suplay kan bakuna sa nasyon.


Sa Pamplona, Camarines Sur sinabi Alcalde Ronaldo ‘‘Boy’’ Franco na igwang manga na daing kasegurohan kun mapabakuna alagad an saindang solusyon iyo an information campaign sa mga barangay. (DPAureus)