SA BANDOJO CASE: Casong robbery with homicide sinangat na sa suspek kan NBI, NCPO sa fiscalia

Nahali na si gabat kan daghan kan familia Bondojo matapos isangat na an casong robbery with homicide sa suspechadong paggadan sa daragitang 17 anyos na si Rossele Bandojo kan Barangay Peñafrancia, Ciudad nin Naga.

An magkatuwang na task force kan National Bureau of Investigation asin Naga City Police Office asin ina kan biktima sinangat an formal na caso mga alas diez nin aga kan Viernes, Agosto 25, 2023 sa City Prosecutors Office kan ciudad.

Sinabi ni Executive Officer Joey Ajero kan NBI Office kan ciudad si Lorenzo Purisima alias ‘’Enso’’, an suspechado iyo an responsable sa paggadan sa daragitang biktima.

Pigbuyagyag pa sa ginibong imbestigasyon na solong ginibo ni Purisima an krimen na sarong construction worker. Sinabi pa na an suspek nag-eerok harani sa residencia kan biktima.

Sa kahapoton kan miembros kan media kun posibleng inabuso an biktima antes ginadan, alagad sinabi na dai na naheling sa ginibong post mortem examination mantang nasa state of decomposition na an bangkay matapos makua sa bakanteng lote sa Acacia St., Barangay Liboton, Ciudad nin Naga poon ining mawara kan Hulyo 22 asin nakua sana kan Hulyo 29.

Si City Director Nelson Pacalso kan NCPO asin EO Ajero kan NBI nagpasalamat sa mga nagcooperar na testigos nganing maging pusog an caso kriminal na saindang sinangat sa fiscalia.

Sinda dakulang tabang sa caso nganing maresolberan an caso asin masimbagan an hinahagad na justicia kan famila kan biktima.

Mientras tanto, nakatalaan determinaran kan NCPO an mga dapat magrecibe kan reward money na nag-total sa P800,000. An sinambit na mga cantidad naghahali ki Congresista Gabby Bordado kan tercer distrito kan Camarines Sur, P100,000; Alcalde Nelson Legacion-P100,000, Nonoy Magtuto – P100,000 asin senador Raffy Tulfo – P500,000.