SA BARANGAY, SK ELECTIONS: COC filling sa Sept 28-Oct 5, 2026 dagos, sabi kan Comelec

Bukas an mga opisina lokal kan Commission on Election (Comelec) nganing magrecibe nin certificate of candidacy poon sa Lunes, Septiembre 28 hasta Oktubre 5, 2026 para sa nakatalaan na Barangay, Sangguniang Kabataan Elections (BSKE) sa Noviembre 2, 2026.

Sagcod na dai pa pinipermahan ni Presidente Ferdinand Marcos an bill sa pag-ukta kan BSKE sa Noviembre 2028, mayong kaulangan sa Comelec nganing ipadagos an mga actividades sa BSKE.

Ini an mga pahayag sa Bicol Mail ni Atty. Maico Julia Jr. Election Officer sa Ciudad nin Naga sa tahaw kan pagkakapasar kan bill sa senado na nag-uuktaba kan BSKE sa Noviembre 2028.

An ano man na pinakahuring desisyon kun pirmehan an bill iyan saindang iimplementar base sa directiva kan saindang opisina central.

Nagtutubod an ibang opisyales de barangay maging Comelec na dakulang posibilidad na makakabot sa Korte Suprema kun aprubaran ni Marcos an bill.

Nag-arabot na sa mga opisina lokal kan Comelec an forma sa COC nganing siisay man na masangat kan saindang candidatura sa SK asin Barangay sainda nang rerecibihon.

Si election lawyer Atty. Romulo Macalintal iyo an piglalaoman na masangat nin petisyon sa SC kun i-uuktaba an pirilian.

Nanindugan an election lawyer na dapat nagtapos an termino kan mga opisyales de barangay asin SK kan Deciembre 2025 matapos kan eleksyon kan Oktubre 2023 alagad pig-uktaba an pirilian hasta pigtalaan sa Noviembre 2026 asin ngunian mawot naman i-uktaba.