SA BARATONG GENERATION COST: Casureco II malaog pa sa ibang power supplier

An junta directiva asin manijamiento kan Camarines Sur II Electric Cooperative (Casureco), Inc. magpapadagos sa paghanap nin ibang power suppliers na barato an generation cost nganing madagdagan an nakatalaan na paghuros kan tarifa sa premirong cuarto ngunian na taon.

An aksyon kan cooperativa nin electricidad sa tahaw kan reclamo kan miembros-consumedores asin negosyantes sa nagparalangkaw na tarifa.

Si Emelita Candia, General Manager kan Casureco II nagpahayag na poon pa kan nakaaging taon 2022 an junta asin manijamiento yaon na sa proceso sa paglaog sa ibang power supplier na hababa an generation cost nganing matapyasan pa an nagpaparalangkaw na tarifa kan kuryente.

Siring kan saindang nakua asin naglaog na sa kontrata sa Power Sector Assets and Liabilities Management (PSALM) Corporation na nag-aabot sana sa Php5.00 per kW an generation cost asin huli kaini ciertong mahuros sa on peso an presenting tarifa kan cooperativa.

Sinabi pa na 10 megawatts pa sana an makukua nindang suplay nin kuryente sa PSALM mantang an cooperativa nin electricidad sa Ciudad nin Naga asin iba pang mga coverage area nagcoconsumo nin 80 megawatts.

An PSALM iyo an may hababang generation cost kumpara sa ibang power suppliers kan Casureco II na nagcacantidad Php12.00 per kW. Sinda iyo an power supplier kan Casureco IV sa Partido area mala ngani an tarifa sa consumo nin kuryente nagcacantidad sanang Php9.00.

Sa ngunian an Casureco II nagdadalagan na singil sa tarifa sa cada kW poon sa Php15.4490 hasta Php17.3085.

Haros gabos na cooperativa nin electricidad sa nasyon nagparalangkaw an singil sa tarifa poon na magkaigwa nin giyera sa Ukraine asin Russia sagcod nagparalangkaw an presyo sa produkto nin petrolyo asin pagmahal kan saindang binabakal na imported na oring. An isyu sa halangkaw na generation cost iyo an saindang mga dahilan mala ngani mayo man nagiginibo sa congreso.

An mahal na tarifa kan mga cooperativa saro pa sa nakakadagdag na problema kan nasyon sa halangkaw na ‘inflation rate’. (dpa)