SA BICOL ELECTRIC COOPERATIVE: Protesta ilalansar vs privatization

Buronyog na kinukundenar kan Bicol Electric Cooperative (BECA) an propuestong ley sa senado nganing isapribado an Camarines Sur III Electric Cooperative (Casureco III) sa Rinconada area sa paagi kan hinahagad na franquicia kan Bicol Light and Power Corporation (BLPC) na padreno kan House bill No. 4437 sa Camara-Baja si Camarines Sur 2nd District Congressman LRay Villafuerte.


An onseng cooperativa nin electricidad sa Bicol sa paagi kan BECA na pinamamayohan ni Rodolfo Vargas kan Ficelco Catanduanes malansar nin protesta sa paagi kan mahiwas na caravan sa Sabado, Noviembre 20 hale sa Virac, Catanduanes asin masabat man an Camarines Norte Electric Cooperative hale sa Daet, Camarines Norte nganing magtiripon sa Casureco III sa Ciudad nin Iriga.


Sa entrevista ki Ann Rochi Iraola, opisyal na parataram kan Casureco III nagpahayag an pag-abot sa Ciudad nin Iriga kan Caravan malibot sa mga banwaan kan Baao, Balatan, Nabua, Bula, Buhi, asin Bato, gabos sakop kan coverage area kan cooperativa.


Si Casureco I General Manager Ana Sylvia M. Alsisto asin Chairman kan Task Force Rinconada Power nagbuyagyag na nagtalaan nin committee hearing si Senador Grace Poe kan Committee on Public Services sa senado para sa public hearing na saindang pighahalat alagad na-alarma sinda kan maaraman na envez kan public hearing pigrerecomendar na sa senado nganing aprubaran.

2019 BECA Caravan liwat mangyayari sa Sabado, Noviembre 20, 2021 “Labanan Bicol Light and Power Corporation”.


An HB 4437 ni Villafuerte matapos makalusot sa plenaryo sa Camara-Baja sinakat tolos sa senado sa committee ni Senador Poe asin sa ngunian posibleng palusoton.


An Casureco III dating ‘‘ailing’’ cooperative alagad sa laog nin apat na taon matapos magcrear kan Task Force Rinconada Power asin pigdesignar si Casureco I GM Alsisto bilang chairman kan task force nakabangon sa problema finansyal sa laog sana nin apat na taon mala ngani pigdeclara kan National Electrification Administration (NEA) bilang Double ‘‘A’’ buot sabihon sa ranking ika-duwa na sa Triple ‘‘A’’ siring kan pagpadalagan ngunian kan Casureco I asin Casureco II.


Sinabi pa ni Iraola hale sa dating ‘‘ailing cooperative’’ nagparalangkaw na an saindang collection efficiency sa 96 por ciento mantang sa system loss nagparababa na sa 12.39 por ciento.


Pusog na kinokontra kan BECA mantang dai lamang pigconsulta sa sainda maging sa manijamiento asin miembros-consumedores kan Casureco III na iyo an apektado asin namemeligro man isunod an iba pang mga cooperativa nin electricidad, sabi pa kan parataram kan Casureco III.


Igwa nang pig-aandam na resolusyon an BECA sa committee ni Poe nganing saindang ipadara an pusog na pagcontra asin kinukundenar an propuestong ley na kulang sa konsultasyon sa apektadong consumedores asin manijamiento.


An franchise application kan BLPC dati nang iginilid sa 17th Congress alagad binuhay ni Cong LRay an bill sa 18th Congress na dagos nang nakasakat sa senado.


Sinabi pa kan enot na committee hearing sa congreso an Energy Regulatory Commission (ERC) nagpatanid na dakula an posibilidad na magdoble an tarifa sa kuryente kun saro nang pribado an pagpadalagan kan cooperativa nin electricidad.


Afuera pa kaini, nahahadit an mga empleados na makakadanay sinda sa peligro na mawaran man trabajo.


Sa Ciudad nin Naga, an Casureco II amay nang nag-aandam kan isyu sa pagsa pribado kan cooperativa asin an saindang ginigibong pagcontra sa paagi kan Black Friday protest.


Sainda pig-eehemplo an nangyayari sa Albay Power and Energy Corporation na dating ALECO na dakul na mga empleado an nawaran trabajo nagparalangkaw pa an tarifa sa kuryente asin nagrereclamo an miembros-consumedores huli kan rurong serbisyo halangkaw pa an tarifa. (dpa)