SA BICOL: P3.2-B winalat na danyos sa agrikultura ni “Kristine’’

Nag-abot na sa Php3,216,179,789.89 an winalat na danyos ni bagyong ‘’Kristine’’ base sa pinkahuring listahan kan Oktubre 30, 2024 kabale an maisan, gulayan, high value crops, fisheries maging sa infrastraktura asin makinarya na gamit sa pag-oma alagad mas dakula si destroso sa paroyan na nilaptop nin hararum na tubig baha.

An destroso saro na sa dakulang danyos sa agrikultura sa rehiyon Bicol kumpara sa ibang naglamasang calamidad.

Si Lovella Guarin, opisyal na parapahayag kan DA nagpahayag sa Bicol Mail uminabot na sa 85,070 mga paraoma asin parasira an apektado na iguang 34,156.34 hektarya na kadakle kan paroyan madali nang anihon. Sa volume of loss nag-abot sa 156,133.41 metrico tonelada.

An hararum na tubig baha asin dai tolos nagbaba si tubig iyo an mayor na dahilan maging kan iba pang produkto agricultural.

An bilyones pesos na danyos sa agrikultura nakadagdag sa enot na danyos sa kaparejong sektor na nag-abot nin sobra sa Php400 -M huli sa bagyong ‘’Enteng’’ kan Septiembre ngunian na taon.

An National Food Authority sa Bicol nagtutubod na ciertong apektado an saindang palay procurement sa huring cuarto ngunian na taon.

Dinagdag pa kan DA Bicol, si mga apektado kan calamidad saindang tinatabangan na mag-claim nin insurance sa PCIC, Cash assistance, Roll out sa Kadiwa ngunian na Noviembre na nag-oopresir nin baratong presyo asin iba pang produkto agricultural.

Afuera kaini, kan Martes, Noviembre 5 nagtao nin financial assistance sa paraoma poon sa P5,000 hasta P10,000 na yaon sa listahan kan RSBSA kan mag-bisita si PBBM asin Secretary Laurel sa CamSur asin Albay.

Sa pinaluwas na datus kan Office of Civil Defense Bicol, abot sa Php6.7-B an danyos sa agrikultura asin infrastraktura sa Bicol huli kan nakaaging calamidad.

Paratienda sa ika-tolong escalon kan NCPM naka-display an alang na sira alagad kulang an gulayon huli kan nakaaging calamidad. (Retrato kua ni Paulo Papa)