SA BICOL PNP: Augmentation force dakulang tabang sa pagmantenir kan paz y order sa peace rally

Nagtutubod an Bicol PNP na pinamamayohan ni BGen Nestor Babagay Jr. bilang regional director na nakatabang an tropa kan kapupulisan hale digdi sa Bicol nganing maging augmentation force sa pagmantenir kan paz y orden sa duwang aldaw na peace rally kan INC contra kurapsyon na ginigibo sa NCR kan Noviembre 16, 17, 2025.

Abot sa on mil na miembros kan PNP an pinadara kan regional office kan PNP hale digdi sa Bicol na kabale an hale sa Naga City Police Office asin PNP Provincial Office kan Camarines Sur.

Nadestino sinda sa National Capital Region komo parte kan operational reinforcement sa protesta kan INC asin iba pang nagparticipar na grupo.

An saindang misyon nganing makadagdag sa tropa kan PNP sa National Capital Region para maseguro an paz y orden.

Alagad antes sinda nag-abante pasiring sa Metro Manila nag-atubang ngona sa briefing kan saindang higher command digdi sa Bicol.

Dai man nakaapektar sa pagkulang-kulang nin pulis sa Bicol mientras na yaon sinda sa misyon sa Manila asin kaya pa kan nawalat na kapupulisan sa saindang mga area of responsibility.

Dati nang gawi kan Bicol PNP an pagpadara nin augmentation force sa NCR kun ini kinakaipuhan para maseguro an seguridad.

Tropa kan Naga City Police Office kabale sa nagpadara nin augmentation force sa peace rally kan INC sa NCR.