SA BICOL PNP: Pandemya nakatabang sa pagbaba kan crime incident

Ciudad nin Legazpi --- An duwang taon nang pandemya na apektado an economia kan satong rehiyon alagad iyo man an pinag-aatribuir kan pagbaba nin 20.34% kan mga crime incident na nakatabang pa digdi an simpleng agenda kan Bicol PNP sa pamamayo ni regional director BGen. Jonel Estomo.


Si Major Marilou Calubaquib, opisyal na parapahayag kan Camp Semion Ola nagpahayag base sa saindang datus puon na mag-asumir kan Abril hasta Oktubre 2021 komo regional director si BGen Estomo padagos na nagbababa an mga crime incident ngunian na taon kumpara kan nagtalikod na taon.


Nagkaigwa nin marhay na bonga an simpleng agenda kan RD na dapat an awtoridad dai maging pabaya sa saindang area of responsibility, na-aapreciar kan mga tawo an saindang trabajo, maghimo nin mga iniciativo sa karahayan kan saindang organisasyon asin maging ordinaryo sana nganing madaling dulokon kan tawo.


Dawa na ngani puon na magbutwa an Covid-19 kan 2019 sagcod na nagbababa an mga crime incident alagad sa bagong liderato ni Estomo puon kan Abril 2021 hasta Oktubre 2021 naheling sa datus an epektivong paghuros kan mga kriminalidad, sabi pa ni Calubaquib.


Sa datus kan Camp Semion Ola kan Abril hasta Oktubre ngunian na taon mas hababa nin 4.84 percent kan kaparejong peryodo kan nagtalikod na taon.


Sa report kan Regional Investigation and Detective Management Division igwang total na 7,676 an naikurit na caso sa sinambit na peryodo, na mas hababa nin 1,443 kan 2020 na igwang 9,109.


Sinabi pa sa datus na nag-aabot na sa 7,189 an consideradong case closed asin 5,855 solve crime.


Sa posibilidad na dagos-dagos na an hababang crime rate sa Bicol hasta sa maabot na eleksyon nasyonal asin lokal sa Mayo 9, 2022, sinabi pa kan Camp Semion Ola na dai sindang kasegurohan mantang mayong ‘‘permanent forecast’’. (DPAureus)