Sa BOSS an transaksyon ayos
Goa, Camarines Sur --- Dakulang kageanan sa mga negociante an pagkakaigua nin Business One Stop Shop (BOSS) na piglalatag kan mga local na gobyerno sa bilog na nacion sa bulan na Enero kada taon.
An BOSS may katuyohan na magin marikas, facil asin menos gastos para sa mga negociante an transaksyon dapit sa renewal o pagbukas nin bagong negosyo. Siring man, sa pagduhol nin madalahay na serbisyo kan gobyerno sa mga negociante base sa mga nakapalaman sa Local Tax Ordinance asin ibang katarakod na ley.
Sa banwaan kan Goa, Camarines Sur an BOSS pigtalaan Enero dos hasta petsa 20, kaparehong bulan. Ini piglatag sa ground floor kan Municipal Hall. Nag-asikaso sa transaksyon kan mga cliente iyo an personahes kan Business Permit Licensing Office (BPLO) sa pamamayo ni Maria B. Vargas, Officer-in-Charge.
Pig-asistehan kan man-iba-ibang representantes kan ahencias kan gobyerno arog kan DTI, BFP, PNP asin mga oficina kan LGU mismo an pagconducta kan BOSS.
Segun ki Orlando F. Pan, Licensing Officer III, sa paagi kan BOSS napapahidale an pagcomple kan mga negociante sa rekisitos kan gobyerno.
Huli kaini nakakaoperar sinda nin lehitimo asin nakakalikay sa penalidad na posibleng ipataw sa sainda. Siring man, sinda nakikinabang kan discuentong pigduduhol sa mga nagbayad kan mga maninigong dues asin fees sa laog kan pigtalaan na periodo.
Dinagdag pa ni Pan na kan nakaaging taon, dakulang numero nin mga negociante an naserbihan kan BOSS asin ngonian na taon linalaoman ninda an kaparehong situacion.
Nanotaran man kan Licensing Officer III na sa mga negosyo sa banwaan kan Goa, an pinakadakol na numero iyo an mga lending firm na kan mga tuminalikod na taon uminabot sa labing 60 gabos.
An mga nagdadagdag man na negosyo digdi iyo an gasolinahan, bangko, courrier service asin mga kakanan. Nagbutwa pa man an wellness spa, gym, laundry shop asin mga veterinary clinic.
Kan bulan na Deciembre, nagbukas digdi nin sarong drive thru kan sarong famosong food chain. Ini an nagserbing dagdag sa saro pang bantog na food chain na enot nang nagbukas sa banwaan na ini.
An Goa iyo an midbid na centro kan comercio sa Partido Area. Nin huli sa stratehikong lugar kaini asin sa pagigin business-friendly kan local government unit sa pamamayo ni Alkalde Marcel S. Pan, padagos na naeengganyo an dakol na mga negociante na magbukas nin negosyo sa banwaan na ini.
Sa presente, kadakol nang mga residentes digdi, saka mga pagtaraid na banwaan an nagmamawot na magbukas na nin sanga digdi an sarong dakulang mall na nakabase sa ciudad kan Naga.
Mientrastanto, sa pagtaraid na banwaan kan Goa, naglatag man kan saindang sadiring BOSS an mga LGU asin nagtaong dakulang kageanan sa mga local na negociante.
Sa banwaan kan San Jose, kairiba kan mga personahes kan gobyerno, may pwesto man an sarong notario publico na nakatabang sa pagpapahidale kan documentos na kaipohan sa transaksyon sa BOSS.
An ideang ini pinagmarhay kan LGU sa paagi ni Alkalde Jerold B. Peña asin suporta ni Tirso P. Delfino, BPLO Officer, tanganing magin orug na marikas an transaksyon digdi.
An Business One Stop Shop (BOSS) sa Goa, Camarines dakulang tabang sa transaction kan mga negociante digdi. (Photo: BPLO Goa)