SA CALABANGA, CAMARINES SUR: P345.6-M propuesto 2022annual budget kan LGU

Puponan nang ripasohon kan Sangguniang Bayan sa Calabanga, Camarines Sur an Php345.6 milyon na 2022 annual budget na naglangkaw nin 35.45 por ciento kumpara sa 2021 annual budget.

Ngunian na taon igwa sanang Php258.1 milyon an saindang annual budget alagad sinabi ni Alcalde Eduardo Severo an biglang halangkaw na prosupuesto kan lokal na gobierno epekto pa kan Mandanas ruling kan Corte Suprema.

Dakulang fondo an nakadagdag hale sa National Tax Allotment (NTA), dating Internal Revenue Allotment (IRA) na igwang dugang na 37.89 por ciento.

Sa Mandanas ruling bako lang hale sa Bureau of Internal Revenue (BIR) an dapat kahirasan sa buwis kan mga lokal na gobierno envez dapat hale pa sa koleksyon nasyonal kan buwis.

Huli kaini, gabos na LGUs naglangkaw an saindang marerecibing NTA alagad nagkaperang mga ahencias nasyonal an madi-devolved sa sainda.

Kabale sa mga ahencias nasyonal na madi-developed sa LGUs iyo an Department of Agriculture, National Irrigation Administration, Department of Environment and Natural Resources (DENR) asin iba pang ahencia nasyonal.

Si Presidente Rodrigo Duterte nagpaluwas na nin executive order No. 138 sa implementasyon sa balyo kan mga gagastoson na fondo sa mga proyekto sa infrastractura, agricultura, social welfare, health care, asin livelihood.

An mga LGUs nagbilog nin devolution transition team para sa saindang pag-aadal kan punksyon base sa seksyon 17 kan RA 7160 o Local Government Code base sa guidelines kan Department of Budget and Management asin kan Department of Interior and Local Government.

An Mandanas ruling resulta kan petisyon sa Corte Suprema ninda Batangas asin pamayo kan Liga nin mga Gobernador Hermilando Mandanas.

An En Banc desisyon kan SC binaba kan Hulyo 3, 2018. (dpa)