SA CALABANGA, CAMARINES SUR: PPO mapadara nin dugang naPNP personnel sa Semana Santa

MapaDAra nin augmentation force an PNP Provincial Office (PPO) ngunian na Semana Santa sa Calabanga, Camarines Sur tanganing maseguro an paz y orden kan mapasiring sa banwaan na ini sa aldaw kan Juevez asin Viernes (Marso 28-29) Santo sa tahaw kan piglalaoman na pagruso kan ribo-ribong debotos ni Amang Hinulid sa Barangay Sta Salud.

Nakaandam na an elementos kan kapupulisan hali PPO Camarines Sur huli ta cada panahon kan Semana Santa dati nang nagpapadara nin augmentation force, sabi ni P/Capt Marlon Lladoc an opisyal na parataram kan PPO.

Bako lang lokal na debotos envez mga turista an masungko sa Amang Hinulid asin kabali ini sa contingency plans kan PNP sa summer vacation para sa safety kan publico.

Kabali sa maruso sa banwaan na ini iyo an mga paratienda nin street foods mantang an ibang residentes pasiring sa Hinulid Chapel taon-taon nagtataong libreng bottled water bilang saindang panata.

An Barangay Council sa pamamayo ni Punong Barangay Aldrin Macawili kan Barangay Sta Salud nagsabi na igwa na sindang pighaman na traffic plan sa coordinasyon sa MPS asin sa lokal na gobierno.

Igwa nang preparadong contingency plans an Municipal Police Station laen kan kapupulisan hali sa PPO asin katuwang an miembros kan barangay tanod.

Naka-alerto an PNP Camarines Sur para maseguro an paz y orden sa lambang municipalidad mantang preparado naman an security plan kan cada MPS, sabi pa ni Lladoc.