SA CALABANGA, CS: Seguridad pig-andam kan PNP sa Semana Santa
Dawa suspendido an mga mayor na actividades religioso sa melagrosong Amang Hinulid sa Calabanga, Camarines Sur ngunian na Semana Santa alagad igwa nang instruksyon an lokal na gobierno sa Municipal Police Station na maging andam sa posibleng pagpumirit kan ibang devotos na mahapit sa Kapilya kan imahen sa brgy. Sta Salud.
Si Alcalde Eduardo Severo nagpahayag an direktiva sa MPS nganing masunod an health standard asin ibinabawal na an lakaw penetencia asin prohibido na sa laog kan Kapilya an devotos nganing malikayan na magdagsa an mga tawo.
Nganing mayong magruso sa kapilya ni hinulid nag-orden si Severo na dapat sarado na ngunian na semana santa.
Inaabot nin on milyon an mga devoto asin turista an nagsusungko sa imahen sa panahon kan semana santa alagad ika-duwang taon ngunian na suspendido an mga actividades sa Amang Hinulid.
An direktiva sa Police Station na iimplementar an gabos na direktiva kan Inter-Agency Task Force (IATF) lalo na an health protocols.
Imahen kan melagrusong Amang Hinulid sa Calabanga, Camarines Sur nasa Kapilya mientras na dai na muna iluluwas huli ta suspendido an mga actividades ngunian na Semana Santa apektado pa kan pandemya. (dpa)
Ibabawal na kan LGU an mga paratienda sa mga gilid kan tinampo mantang mayo nang mangyayaring prusesyon.
Sinabi pa kan jefe ejecutivo na an saindang desisyon sa pagsuspendi kan gabos na actividades sa imahen base sa konsultasyon na ginigibo ninda sa manlaen-laen na sektor asin religious organization.
Si Obispo Rolando Tria Tirona kan Archidioceses nin Caceres nagpaluwas na nin Circular No. 003 serye kan 2021, listahan kan general guidelines sa Domingo de Ramos, Lunes, Martes, asin Miercules kan Semana Santa; Juevez santo, Viernes santo, Easter Vigil, Easter Sunday asin celebrasyon kan sacramento.
Mayo na kan tradisyonal na ‘‘Hosanahan’’ na envuelto an mga aki alagad igwa pang pagbendisyon kan palaspas.
An magiging celebrasyon na sana arog kan prusesyon kan Nazareno asin Dolorosa, lunad sa vehiculo karibay kan prusesyon kan pasos.
An Siete Palabras sa Cathedral sa paagi na kan social media mantang an mga Parokya dai na masadiring Siete Palabras.
Sinabi pa sa Circular cancelado naman an Cenakulo asin iba pang actividades alagad lilimitaran an malaog sa simbahan nganing estrictong implementar an health protocols. (DPAureus)