top of page

SA CAMARINES SUR, CAMARINES NORTE: NFA buying price sa paroy nagsakat sa P30 kada kilo

Nag-iimplementar na an National Food Authority (NFA) sa Camarines Sur/Camarines Norte Branch Office sa pagpalangkaw sa presyo sa palay buying price kan paraoma hale sa dating P23 envez ginibo nang P30 cada kilogram na nagpoon kan huring semana kan Abril 2024.


Epekto kaini, naglangkaw si palay procurement sa duwang provincia kan nagtalikod na bulan hasta kan Abril 30, 2024 hale sa target na 13 mil na sakong paroy naglangkaw sa 14,820.


Alagad sa Camarines Norte iguang dugang na P5.00 hale sa alokasyon kan LGU na igua nang total na P35.00/kg komo subsidiya sa paraoma nganing masabayan an paglangkaw kan presyo sa pribadong kumprador. An fondo kan LGU Camarines Norte kasunod sa implementasyon kan Palay Marketing Assistance Program for Legislators and Local Government Units (PALLGU).


Ini an mga pahayag sa Bicol Mail ni OIC Branch Manager Marbin Malabanan kan NFA CamSur/CamNorte Branch Office sa tahaw kan panahon pa nin aranihan nin paroy. An pagsaro sa duwang provincia kan NFA nag-epekto huli sa mandato kan Rice Tariffication Law (RTL) na pig-implementar kan opisina sentral sa panahon ni dating Presidente Rodrigo Duterte.


An dugang na presyo sa palay buying price kasunod kan naging desisyon kan NFA Council nganing matabangan an sektor nin paraoma mantang naglalangkaw an presyo kan bagas sa mercado nagpa-implementar kan dugang na presyo. An dating presyo P19 hasta P23/kg alagad sa ngunian si malinig asin alang na paroy cantidad nang P30/kg, sabi pa ni Malabanan.


An desisyon kan NFA Council na langkawan an presyo bako lang sa paraoma envez ma-eenganyar sa sainda na magtanum asin malangkaw pa an rice inventory kan suplay nin bagas.


Nagseguro an NFA Camarines Sur/Norte na parating awad-awad an saindang fondo sa palay procurement mientras na ensigida an saindang opisina sentral napadara nin fondo nganing derederetso an programa sa palay procurement.


Igwa nang labi sa 22,000 stock na sakong paroy an saindang bodega sa duwang provincia mantang nagpapadagos an saindang pagmolino kan bagong anihon na paroy nganing segurohon na marhay an calidad kan saindang suplay nin bagas.


An stock nin bagas kan ahencia ginagamit bilang food security orog na kun igwang calamidad asin prohibido na magsuplay bagas sa mga mercado base sa Rice Tariffication Law. (dpa)


Nagdadakul an stock kan paroy sa bodega kan NFA Camarines Sur/Camarines Norte kasunod kan paglangkaw sa buying price kan paroy na nag-epekto kan Abril 2024. (NFA CSur file photo)

Comments


bottom of page