SA CAMARINES SUR: P6.1-B 2024 annual budget kan Capitolio lusot na sa SP

Amay nang inaprubaran sa Sangguniang Panlalawigan kan Camarines Sur an 2024 annual budget na nagcacantidad P6,199,390,000.00 na mayong nagcontra envez nag-abstain an duwa sa treceng miembros kan junta.

Sa ginibong sesyon regular kan Martes, Deciembre 13, 2023 pigborotohan kan mayoriang miembros kan SP an proposed 2024 annual budget nganing antes maglaog an taon 2024 pirmado na ni Gobernador Luigi Villafuerte an bagong budget, sabi ni Vokal Romulo Hernandez, Vice Chairman kan Appropriation Committee kan SP.

An duwang miembros kan oposisyon na sinda Vokal Emmanuel Llaguno asin Eugene Fuentebella kan ika-apat na distrito kan Camarines Sur nag-abstain sa borotohan mantang gabos na kaalyado kan gobernador kabali na si tolong mga ex-officio member anas nagboto pabor.

Naglangkaw na an annual budget para sa sunod na taon hali sa dating P5.1 bilyon ngunian na 2023 asin sa 2024 nagsakat na sa P6.1 bilyon.

Sa recapitulation of CY 2024 annual budget (General Fund) I. Income a) Local Revenue - P2,570,454,214.00; b) National Tax Allotment, P3,628,935,786.00 na igwang total income – P6,199,390.000.00.

II. Expenditures: a)Personal Services, P1,361,285,608.00; b) MOOE, P3,000,000.00; c) Capital Outlay – P688,168,392.00; d) Financial Expenses, P2,900.000.00; e) Special Purpose Appropriation (SPA), P1,147,036,000.00 na igwang total expenditures P6,199,390,000.00.

PAG-ANDAM SA 2025?. Si Representante Gabriel H. Bordado Jr kan tercer distrito kan Camarines Sur nagtataong mensaje sa Pasko sa ginigibong Christmas party kan Association for Citizens Empowerment and Security (ACES) asin Lakas ng Kababaihan sa Calabanga, Camarines Sur alagad enot nang nagsabi na ‘’Joke lang’’ an saiyang mga pahahayag sa tiripon kan bagong mga elehidong Punong Barangay na macandidatong alcalde sa Calabanga sa masunod na eleksyon lokal. (Glenda Dasco FB)