SA CASURECO 1: GM Alsisto andam sabatonan mga libel, cyber libel case

‘‘Sa deretso lang, sa tama sana, dagos an laban’’. Ini an mga pahayag ni General Manager Ana Sylvia M. Alsisto kan Camarines Sur I Electric Cooperative (Casureco I) sa entrevista kan Bicol Mail kasunod kan saiyang kumfirmasyon na tolong casong libel asin cyber libel an saiyang inaatubang na sinangat sa saiya kan 2019.

Naging ugat kan inaatubang na mga caso huli kan pagcontra na magtaong campaign contributions an mga cooperativa nin electricidad na an cuarta hale sa miembros-consumedores para sa candidatong PHILRECA party-list.

Si Alsisto nagsangat caso sa Presidential Anti-Corruption Commission (PACC) base sa pag-aprubar ni Masongsong kan ‘‘illegal contributions’’ na pinaboran kan Malacañan an saiyang reclamo sagcod na sinipa ni Presidente Rodrigo Duterte bilang NEA administrator huli sa kurapsyon na pig-anunciar pa sa national television.

Sa counter affidavit ni Masongsong an paliwanag kaini, dai niya inaprubaran an resolusyon kan mga cooperativa nin electricidad nganing magtaong campaign contributions sa party-list envez an kasimbagan kaini ‘‘I did not approve. I just interposed no objection’’.

Alagad sa tahaw kan saiyang ginigibong preparasyon para sa caravan kan onseng cooperativa nin electricidad sa Bicol sa nakatalaan na regional caravan para sa Noviembre 20, biglang nakarecibe siya nin inpormasyon kan Viernes na hapon, Noviembre 19 hale sa corte sa Ciudad nin Quezon na igwang iseserbing mandamiento de aresto sa saiya.

Sinabi kaini, na insigida siya nag-andam kan P30,000 nganing makabayad tolos nin ‘‘bail bond’’ sagcod na voluntad nagpasiring sa Municipal Police Station kan Libmanan, Camarines Sur nganing ipaisi na ‘‘nag-post’’ na siya nin piyansya asin dai nagdudulag na atubangon an caso.

Kun dai na-asikaso bago mag-alas 5:00 nin hapon (Noviembre 19) ‘‘dai ko makaka-participar sa caravan kan Sabado’’, sabi pa ni Alsisto.

An casong libel asin cyber libel sinangat ni Masongsong sa corte sa Ciudad nin Quezon contra sa GM kan Casureco I huli kan saiyang enot na sinangat na reclamo laban sa dating NEA administrator sa Presidential Anti-Corruption Commission (PACC) asin sinipa sa puesto ni Duterte na saiyang pig-anunciar kan Agosto 21, 2021.

Sinabi pa ni Alsisto enot na nagsangat sa saiya kan kaparejong caso iyo si PHILRECA party list Congressman Presley de Jesus sa saiyang provincia kan Isabela.

Alagad si ika-tolong caso sa Ciudad nin Quezon, binasura na kan fiscalia.

Kinasohan siya kan dating NEA administrator huli sa alegasyon na kaputikan an pinaluwas na bareta kan Bicol Mail kan 2019 hale sa ginibong press conference kan GM asin mga opisyales kan cooperativa.

Naprubaran an saiyang reclamo sa PACC na dagos nang hinale sa posisyon sa NEA.

SA CARAVAN VS PRIVATIZATION

Maabot sa 80 mga vehiculo an nagparticipar sa saindang caravan kan Sabado, Noviembre 20, 2021 na may tema ‘‘Labanan Bicol Light and Power Corporation (BLPC) hale sa onseng mga cooperativa nin electricidad sa anom na provincia kan Kabikolan.

Nakasulot nin itum na T-shirt na saindang pigkukurawan na labanan an BLPC asin ibasura an house bill 4437 asin rekomendasyon ni Senador Grace Poe sa senado na aprubaran na an bill nganing matawan nin franquicia an BLPC.

Digdi sa Camarines Sur nagpuon sa banwaan nin Milaor, Ciudad nin Naga, Pili, Camarines Sur sagcod na naglibot an Caravan sa mga banwaan kan Rinconada area na coverage area kan Casureco III.

An protesta suportado kan ribo-ribong miembros-consumedores sa Rinconada district.

Bako lang sa Camarines Sur maging sa Albay asin iba pang provincia kabale sa nagparticipar.

An Bicol Electric Cooperative Association nagpaluwas nang resolusyon na nagkukundenar sa rekomendasyon ni Senador Poe nganing aprubaran an bill sa franquicia kan BLPC.

An Casureco III hale sa ‘‘ailing cooperative’’ alagad sa pagpadalagan kan Task Force Rinconada sa paagi ni Alsisto bilang chairman napakarhay an manijamiento sagcod na pigdeclara kan NEA komo double ‘‘AA’’ categorization.(dpa)