SA CASURECO I: Bakong ‘‘ailing cooperative’’ alagad taohan kan NEA an matukaw na AGM

Libmanan, Camarines Sur --- Posibleng bakong taga laog kan Camarines Sur I Electric Cooperative (Casureco) Inc. an papatukawon na acting general manager sa maretiro nang General Manager Ana Sylvia M. Alsisto envez hali sa National Electrification Administration (NEA) mientras na nagpalyar si plano kan sarong politico dapat si saiyang rekomendadong sarong abogado na taga Ciudad nin Naga.

Dai mangyayari an saiyang plano na kapotan kan saiyang taohan an Casureco I nin huli ta mabalga kan NEA Memorandum, sabi pa sa masasarigan na inpormante kan Bicol Mail.

Alagad cuestionable naman sa manijamiento kan Casureco I an pagbugtak nin acting general manager na hali sa NEA sa dahilan an cooperativang ini bakong ‘‘ailing cooperative’’ asin pitong taon nang Triple A sagcod sa ngunian sa manijamiento kan maretiro nang general manager.

Aram kan NEA na igwa sindang pulisiya na kun bako man ailing cooperative orog na kun ‘‘Triple A’’ dai kinakaipuhan na hali pa sa saindang ahencia alagad dapat ipadagos kan ibubugtak na OIC GM hali sa laog.

Si Alsisto na-extendir an saiyang posisyon sa cooperativa hasta Deciembre 31, 2023 mantang nasunoan kan miembros-consumedores an saiyang manijamiento na naging Triple A an cooperativa sa laog nin pitong taon sa onseng taon na pagpugol niya bilang general manager.

Ini base sa AGMA Resolution asin inaprubaran kan junta directiva kan Agosto 6, 2021 alagad huli sa ‘‘political pressure’’ pinagmarhay na magretiro na poon nuodman Deciembre 30, 2022.

Mayo paman paliwanag an junta directiva kun ta’no ta sinayumahan kan NEA an saindang pigrekomendar na taga laog na si Engr. Noel Laureles.

An pagiging multi awarded na general manager ni Alsisto saro man sa pigbasehan kan miembros-consumedores sa paagi kan AGMA na dapat palawigon pa an saiyang serbisyo hasta Deciembre 31, 2023, alagad nagpa-aram na sa junta na tama na sagcod na sana siya sa Deciembre 30, 2022.

An saiyang surat sa board of director petsado Noviembre 28, 2022 asin inaprubaran kan junta kan Deciembre 3, 2022.