SA CASURECO I: Renewal kan franquiza dadangogon sa senado ngunian na Sept 3, ‘26

Maatubang ngunian na aga (Septiembre 3) sa Committee on Public Utilities sa senado an mga opisyales kan Casureco I sa pamamayo ni General Manager Edna Valerio para sa saindang petisyon sa hinahagad na renewal kan 25 anyos na franquiza.

Si Diputado Nelson Legacion kan tercer distrito kan Camarines Sur iyo an pagdreno sa petisyon kan renewal sa franquiza alagad kinokontra kan sarong poderosong politico sa Camarines Sur sa tahaw kan saiyang pig-eendorsar na sarong pribadong electricidad.

Mayoria sa mga alcalde na sakop kan serbisyo kan Casureco Uno an nagpirma na nag-eendosar sa 25 anyos na renewal kan franquiza. An mga alcalde kinababalehan ninda Alcalde Son Marfil kan Libmanan, Nino Tayco kan Pasacao, Alcalde Manuel Agustin kan Pamplona, Alcalde Tom Bocago kan Sipocot asin Alcalde Diano Ibardaloza, Jr. kan Camaligan. An saindang endorsement narecibe na sa Committee on Public Utilities sa Camara-Baja asin sa ngunian yaon na sa senado.

Napag-araman na iguang politico sa Camarines Sur na mawot ipabawi sa sinambit na jefe ejecutivo an saindang endorsement na nagpapabor sa franquiza sa sinambit na cooperativa nin electricidad.

Kasabay sa committee hearing sa senado iyo an First Catanduanes Electric Cooperative asin Casureco II alagad kan apodan kan Bicol Mail an saindang spokesperson Rinner Bucay nganing hagadan inpormasyon dai nagsisimbag sa telepono.