SA CASURECO II: 3 incumbent director, saro bagohan manga ganador sa district election

Tolong mga reeleccionista direktor asin sarong bagohan na candidato sa nagtapos na district election kan Camarines Sur II Electric cooperative (Casureco II) Inc. kan Oktubre 1, 2022 pigdeclara kan Election Committee komo mga ganador.

Apat na distrito kan Casureco II nagkunducir nin sarabay na eleksyon kan Oktubre 1 alagad si incumbent director asin Board President Gay Loreto Pabines kan Milaor District iyo sana an may kalaban na si Reynaldo Cano na suportado pa ni Alcalde Labas Reyes.

Si Pabines nakakua nin 1,669 voto kontra ki Cano – 1,411 mientras na sa iba pang distrito na mayong mga kalaban sinda, Calabanga incumbent director John Paul Santa Ana – 47 voto; Siruma incumbent director Jessie Delmoro – 37 voto; asin sa Tinambac si Alex Abiog, premirong pag-candidato – 40 voto.

Si mga mayong kalaban na candidato nag-aabot sana sa .35 hasta .45 por ciento an nagparticipar sa nagtapos na district election, afuera sa Milaor district, 41 por ciento.

An Siruma asin Tinambac dating saro sanang distrito, alagad matapos aprubaran kan National Electrification Administration na gibohon nang duwang distrito na implementar sana ngunian na taon.

An Canaman District dapat nagsabay na sa district election kan Oktubre 1, alagad mayong candidato nagplantiar kan saindang certificate of candidacy sa Institutional Service Department kan Casureco II.

Sinabi ni Rinner Bucay opisyal na parataram kan Casureco II posibleng gibohon an district election sa 2023 asin depende sa NEA kun nuarin mapaluwas nin memorandum nganing isabay na sa Bombon district na bakante an puestong direktor.

An mangyayari kaini, segun pa ki Bucay an NEA iyo an madesisyon kun anong distrito an temporaryong mga direktor na masakop sa duwang distrito na bakante an tukawan. (DPA)