SA CASURECO II: Milaor district mayong nagsangat nin COC sa pigtalaan na district elections

Saro sa tolong distrito kan Camarines Sur II Electric Cooperative (Casureco ll) mayong nagsangat nin certifico de candidatura (COC) bilang director sa pigtalaan na district elections sa Sabado, Oktubre 4, 2025.

An Milaor district iyo an mayong nagplantiar nin COC mantang sa Canaman district saro sana an nagsangat nin candidatura na cierto na an kapangganahan ni Wilson De Castro asin sa Calabanga district duwang candidato na kinababalihan ninda dating Consejal Danilo Gonzales asin Sofia Pelonio.

An cooperativa estrico sa mga kualifiscasyon nganing macacandidato na dapat tapos nin apat na taon sa colegio, duwang veces nakaatendir sa AGMA asin dakul pang iba kun ikukumpara sa lokal asin nasyonal eleksyon na dawa dai tapos nin ano man na kurso sa colegio calificado na asin rehistrado sana sa Comelec komo botante.

Si director Gay Pabines kan Milaor district discalificado nang mag re-election huli ta matapos na kan saiyang ika tolong termino o siyam na taon. Huli kaini, mawawaran nin representante sa junta directiva kan Casureco II.

An voting center sa Calabanga district gigibohon sa Calabanga Central Division Pilot School, mapoon an borotohan alas 8:00 nin aga hasta alas 3:00 nin hapon mantang sa Canaman district an voting center sa Canaman Central School sa kaparejong municipalidad asin eleksyon mapoon alas 8:00 nin aga hasta alas 3:00 nin hapon.

Si Rinner Bucay opisyal na parataram kan cooperative pig-eengcaminar an miembros consumedores na magparticipar sa pirilian.

An bagong elihidong mga director maasumir sa pwesto kasabay sa gigibohon na general membership meeting sa enot na Sabado kan Deciembre 2025.