SA CASURECO II: Pagpalawig kan legislative franchise papadrenohan ni Rep Legacion

An bagong representante kan tercer distrito kan Camarines Sur Atty. Nelson Legacion nagcierto sa manijamiento kan Camarines Sur II Electric Cooperative (Casureco II) na saiyang papadrenohan an house bill para sa extension kan legislative franchise kan kooperatiba nin electricidad.

An congresista nag-atubang sa opisyales kan kooperatiba sa pamamayo ni Project Supervisor/OIC General Manager Engr. Edgar Piamonte asin sa mga miembros kan junta antes nag-asumir sa pwesto kan Hulyo 1.

An 25 taon na legislative franchise kan Casureco II nakatalaan nang magpaso mantang an kooperatiba yaon sa saiyang sakop na distrito nagcierto sa manijamiento na siya na an mapadreno kan bill.

Si Alcalde Leni Robredo kan Naga enot naman nakipag-ulay sa manijamiento na mayor na isyu iyo an pagpakarhay kan serbisyo sa ciudad.

Kabale sa natukar iyo an paghagad kan dating alcalde kan ciudad asin ngunian representante an pagpahale na kan mga poste sa tahaw kan mga pinahiwas na tinampo kan Department of Public Works and Highways, alagad sinabi ni Piamonte na igua man obligasyon an ahencia nganing halion asin ibalyo sa gilid kan tinampo.

An renewal kan legislative franchise dapat 25 taon man giraray.

An kooperatiba iguang labi sa 140 mil na miembros kan kooperatiba na sakop an municipalidades kan Pili, Ocampo, Calabanga, Tinambac, Siruma, Bombon, Magarao, Canaman, asin Camaligan gabos kan Camarines Sur asin Ciudad nin Naga.