SA CASURECO II: Power Supply Agreement sa PSALM, dai pa napipirmahan

Duwang semana nalang matiklop na an premirong cuarto ngunian na taon pendiente pa an dokumentos kan Camarines Sur II Electric Cooperative (Casureco II) kun nuarin maaprubaran kan Power Sector Assets and Liabilities Management Corp. (PSALM) an saindang Power Supply Agreement (PSA).

Napag-araman ni Rinner Bucay, opisyal na parataram kan Casureco II yaon pa sana sa lamesa kan Legal Department an dokumentos sa tahaw kan saindang pangako sa laog kan premirong cuarto puede na nindang iimplementar an pagtapyas nin tarifa sa kuryente.

Sinabi pa dapat mapirmahan an PSA sa Marso 22, 2023 alagad an problema igwa nang naenot na mga cooperativa nin electricidad na napirmahan an Power Supply Agreement sagcod sa ngunian dai pa nagsusuplay kan PSALM.

Kan Enero 23, 2023 pinaluwas sa FB page kan Casureco II na igwa na sindang kasundoan sa bagong power supplier, PSALM Corp. nganing magsuplay sa cooperativa nin 10 megawatt (MW) power supply alagad si saindang paglaom na maamay an pirermahan sa PSA nagpalyar asin sagcod sa ngunian naghahalat pa sinda.

Kun mangyari an bagong power supplier iyo an may hababang generation cost na nagcacantidad sana nin P5.00 cada kW na iyo man an pigpangako sa miembros-consumedores na matapyas man sinda kan tarifa sa kuryente.

An saindang presenting power supplier halangkaw an generation cost na nag-aabot sa P12.00 kumpara sa PSLAM na P5.00.

Sa ngunian envez na maghuros an saindang tarifa naglangkaw naman mala ngani nagsisingil nin P17.83 cada kW hali sa P17.30.

An causa kan pagparalangkaw kan tarifa sa kuryente bako lang sa Casureco II envez haros sa enterong coooperativa nin electricidad sa nasyon epekto kan giyera sa Ukraine asin Russia na naging dahilang kan paglangkaw sa produkto nin petrolyo asin halangkaw na tarifa kan mga power supplier. (dpa)