Sa Casureco II: Primerong suhay na district election sa Tinambac, Siruma pigtalaan sa Oct. 1

Magkakaigwa na nin suhay na district election kan Camarines Sur II Electric Cooperative Inc. (Casureco II) an banwaan nin Siruma asin Tinambac sa Partido area na dating saro sanang director.

An eleksyon pigtalaan kan Casureco II sa Oktubre 1, 2022 isasabay na an mga distrito kan Calabanga, Milaor, asin Canaman alagad an Bombon district dai kabale matapos magpalyar si eleksyon kan April 9, 2022 huli kan kawaran nin calificadong candidato.

An National Electrification Administration (NEA) inaaprubaran an pagsuhay sa duwang distrito kan Siruma asin Tinambac na dati saro sanang representante an pigpipiling director sa junta directiva.

Inabot nin apat na taon antes inaprubaran kan NEA an resolusyon kan Annual General Membership Assembly (AGMA) kan cooperativa mantang iginilid kan ahencia antes nagdesisyon.

Sa lado kan Casureco II, mayo na nin isyu sa sainda mantang enot nang inaprubaran kan junta directiva sagcod sa AGMA kan cooperativa.

Katuyohan kan AGMA nganing an director matawan nin atensyon an mga programa sa electrification sa mga barangay asin iba pang mga reclamo kan miembros-consumedores.

An representante kan junta sa ngunian kan Siruma-Tinambac district saro sana asin taga Siruma, Camarines Sur huli kaini, nagrereclamo an mga miembros-consumedores kan Tinambac na daing gayo natututokan kan sarong director an saindang banwaan sa mga problema sa suplay nin kuryente.

Mientras tanto, an Institutional Service Department (ISD) kan cooperativa matalaan nin petsa asin bulan kun nuarin puedeng mag-file nin certificate of candidacy an mga interesadong magcandidato. (dpa)