SA CASURECO III: Renewal kan congressional franchise yaon na sa congreso

Pinangenotan ni ML partylist Congressman Leila De Lima an pagsangat kan House Bill 5132 para sa renewal sa congressional franchise kan Camarines Sur III Electric Cooperative (Casureco III) Inc.

Sinabi ni De Lima komo tubong Ciudad nin Iriga dapat lang matabangan niya an Irigueños asin mga taga Camarines Sur asin mga municipalidades kan Baao, Bato, Buhi, Bula, asin Nabua na sakop kan serbisyo kan cooperativa nin electricidad nganing magpadagos an electric power distribution system sa Rinconada.

Sa ngunian nagpapadagos an serbisyo kan cooperativa para sa eficienteng serbisyo sa miembros consumedores dawa na ngani dai mahahalian nin reclamo.

Nagtutubod si De Lima na susuportaran kan saiyang pag-iriba an bill nganing magpadagos an serbisyo asin suplay nin kuryente kan Casureco III.

An apat na cooperativa nin electricidad sa Camarines Sur nag-apply kan saindang renewal kan congressional franchise alagad sa ngunian an naka-renew pa sana iyo an Casureco IV sa Partido area na sakop ni Representante Arnie Fuentebella.

An mga pendiente pa iyo an Casureco I na nasasakopan kan segundo distrito, asin Casureco II kan tercer distrito kan provincia na parejong padreno kan bill si Representante Nelson Legacion.

Sa ngunian 25 taon nalang an tinataong congressional franchise sa gabos na cooperativa nin electricidad sa nasyon hale sa dating 50 taon.