top of page

SA CIUDAD NIN IRIGA: DepEd nag-iimplementar na kan modular learning

Maabot na sa quince escuelas publica kan Department of Education (DepEd) sa Ciudad nin Iriga an nag-iimplementar kan ‘‘modular mode of learning’’ sa mga estudiantes sa elementarya asin high school sa tahaw kan sinasapong halangkaw na temperatura huli kan El Niño.


Sa entrevista kan Bicol Mail ki City School Division Superintendent Manny De Guzman kan DepEd sa Ciudad nin Iriga, sinabi kaini na sunod-sunod na mga escuelahan an nagsumiter kan saindang kahurotan nganing ipasunod sa mga estudiantes asin paratukdo an modular learning.


An DepEd dai naman madidificilan sa implementasyon kan modular learning huli ta dati na ining ginibo kan panahon nin pandemya, sabi pa ni De Guzman.


Dai palang nahahaloy an Philippine Atmospheric, Geophysical and Astronomical Services Administration (PAGASA) nagpatanid kan mamateon na paglangkaw kan temperatura sa nasyon na puedeng magtama sa heat indexes hale sa 42 hasta 51 degrees celsius na mapeligro sa salud kan paratukdo maging sa empleados kun ipapadagos an in-persons classes.


Bako gabos na escuelahan naghuhurot kan modular learning envez depende mantang igwang escuelahan nagpapadagos kan face-to-face classes mantang mapresko an lugar.


Huli kaini, si DepEd Regional Director Gilbert Sadsad nagpaluwas nin memorandum sa gabos na School Division Superintendents asin School Head sa escuelas publica maging sa pribadong escuelahan na nagtutugot sa mga escuelahan sa rehiyon cinco nganing mag-implementar kan modular mode of learning.


An sinambit na memorandum nagtutugot sa estudiantes na puedeng maglaog sa klase nin dai naka school uniform asin iba pang distance learning modality.


Sa ngunian igwa nang ibang mga escuelahan an nag-iimplementar kan regional memorandum siring sa Ciudad nin Naga, Camarines Sur asin iba pang public asin private schools sa Bicol. (DPAureus)

Comments


bottom of page