SA CIUDAD NIN NAGA: 2 sekta nagsisikwal kan STL
Duwa nang sekta sa Ciudad nin Naga nagpahayag kan saindang panindugan contra sa pagtugot kan City Hall sa operasyon kan Small Town Lottery (STL) na nagpoon na kan Noviembre 15, 2023 mantang apektado man giraray digdi an kapobrehan sagcod jovenes.
Alagad an lokal na gobierno kan ciudad nagpaliwanag na mandato sa PCSO charter dawa mayong business permit an LGU dagos an operasyon kan sugal.
An Archidiocesis nin Caceres sa paagi ni Padre Louie Occiano, Director kan Caceres Commission on Communication (CCOM) nagpahayag na dai ninda suportado an pagtugot kan operasyon kan STL sa Pilgrim City huli ta haloy nang panindugan kan simbahan laban sa ano man na sugal. An saro pang sekta iyo an Muslim Islam, sinabi ni Mike Mustapa pamayo kan Muslim Community nanindugan na dapat lang isikwal sa ciudad an operasyon kan STL na dating jueteng dawa legal o ilegal huli ta haloy na sindang nagcocondenar sa ano man na sugal.
Magkakaigwa nin epekto social asin moral mantang haloy nang kinukundenar kan Catholic Bishop Conference of the Philippines (CBCP) an ano man na sugal magin legal o ilegal.
An simbahan saindang pigpopontohan na an sugal sarong ‘‘potential for addiction’’. Kun addict na sa sugal an sarong indibidwal puedeng mapabayaan na an saiyang mga responsibilidad sagcod na maging envuelto pa sa pandadaya ngani sanang makataya o ipusta sa sugal.
Magin an familia na addict na sa sugal maresulta sa problema pinansyal asin mayormenteng apektado iyo an ‘vulnerable populations’.
Sinabi pa ni Mustapa dai man nagrarayo an pagtubod ninda sa Catolico Romano huli ta apektado man giraray digdi an kapobrehan mantang si ibabakal nin sarong kilong bagas kun madaog gutom an kaaabtan kan familia.
An mga jovenes maging estudiantes dai maiibitaran na magtaya sa STL huli ta dawa saen na barangay asin kanto igwang kolektor.
Magin an ibang lider kan sektor nin transporte sa ciudad nagpahayag na dapat dai tugotan an STL sa ciudad na nagtutubod sinda an apektado man giraray digdi an kapobrehan. Sinabi pa kan panahon ni dipuntong Alcalde Jesse M. Robredo na naging bantogan sa pagpadalagan kan ciudad sa iaapod na ‘Good Governance’ dai nagtugot sa sugal.
SA CITY HALL
Pinaliwanag ni Alcalde Nelson Legacion na an operasyon kan STL igwang pagtugot an gobierno nasyonal sa paagi kan PCSO dawa dai na magkua nin business permit na nangyayari man ini sa ibang mga banwaan.
Si Branch Manager Jobet Ramos kan Provincial Office kan PCSO sa Camarines Sur nagkunfirmar na dai na kaipuhan an business permit kan sarong LGU mantang mandato kan gobierno nasyonal an operasyon kan STL.
Sinabi pa ni Ramos kan Oktubre 4, 2023 si STL Area Manager Randy Tayao kan Emerald Venture and Gaming Corporation nagcortesiya na sa City Hall asin pinarecibe si dokumentos sa operasyon kan sugal mala ngani nagpoon na kan saindang gogo kan Noviembre 15, 2023 na may opisina sa Barangay Cararayan, Ciudad nin Naga.
Kinumfirmar pa kan opisyal kan PCSO base sa saindang charter dawa dai na magkua nin permit sa LGU puede nang magpadagos kan operasyon alagad an area manager nagcortesiya man giraray sa City Hall.
Apesar kan mga pahayag kan PSCO na puedeng magpadagos an operasyon kan sugal dawa mayong business permit, si Consejal Sonny Rañola pamayo kan Committee on Games and Amusement sa Sangguniang Panlungsod nagpahayag sa media na kan Oktubre 18, 2023 an area manager kan STL nagsurat sa sainda na naghahagad nin business permit alagad nagpapadagos na kan saindang bola tolong veces aroaldaw.
An kahagadan kan STL yaon na sa lamesa kan Committee on Laws and Ordinance kan SP na pinamamayohan ni Consejal Ghiel Rosales.
An draw court kan Small Towm Lottery (STL) sa Sitio San Rafael, Barangay Cararayan, syudad nin Naga na pigpapadalagan kan Emerald Ventures Gaming Corporation.